Qazaqstandyqtar kúdikti kontenti bar saıttarǵa shaǵymdana alady
Bul týraly mınıstr Feısbýktegi jeke paraqshasynda jazdy.
«Qymbatty dostar, bizdiń mınıstrlik saıtynda «Shaǵymdaný» bólimi ashyldy. Ol jerge kez kelgen azamat Internette Qazaqstan zańnamasyna qaıshy keletin aqparattyń jarııalanǵany týraly habarlamasyn qaldyra alady.
Másele, negizinen áleýmettik jelilerdegi sýıtsıdti, esirtkini nasıhattaǵan, terrorızm men ekstremızmge, qatygezdik pen ultaralyq janjalǵa úndegen toptarǵa jáne saıttarǵa qatysty.
Atalǵan bólimde qoldanýshy zań buzýshylyq kategorııasyn tańdap, materıaldyń siltemesin engizip, shaǵymyn ýákiletti organǵa joldaı alady. Biz tirkelý formasynyń qoldanýshy úshin barynsha yńǵaıly, qarapaıym bolýyn qamtamasyz etýge tyrystyq.
Mınıstrlik árbir shaǵym boıynsha jedel áreket etip, jarııalanǵan materıaldarǵa quqyqtyq baǵa beredi. Eger zań buzýshylyq naqtylansa, olar elimizdiń aýmaǵynda buǵattalady.
Sonymen qatar, bizge jýrnalıster tarapynan qandaı da bir resýrstyń ne sebepti buǵattalǵany týraly suranym jıi túsedi. Osy oraıda biz mundaı aqparat qoǵam úshin ashyq bolýy kerek dep sanaımyz.
Sondyqtan, aldaǵy ýaqytta resýrstardyń jabylýynyń sebebin kórsete otyryp, buǵattalǵan siltemeler bazasyn qurýdy josparlap otyrmyz.
Eger ózińizge nemese jaqyndaryńyzǵa qaýip tóndiretin kontentti kórseńiz, siltemesin myna adreske joldaýyńyzǵa bolady: https://mic.gov.kz/kk/complain», dep habarlady Dáýren Abaev.
