Qazaqstandyqtar koronavırýs vaktsınasyn saldyrýǵa mindetti degen aqparat - jalǵan
NUR-SULTAN. QazAqparat - Qazaqstanda COVID-19 vaktsınatsııasynan bas tartýǵa bolmaıdy degen aqparat jalǵan, dep habarlaıdy QazAqparat Stopfake.kz resýrsyna silteme jasap.
Qaznet qoldanýshylary Qazaqstanda koronavırýstyq ınfektsııaǵa qarsy vaktsınatsııalaý mindetti bolatyny týraly jańalyqty talqylap jatyr.
Olar 2020 jylǵy 24 qyrkúıektegi «Medıtsınalyq kómektiń kepildik berilgen kólemi sheńberinde qarsy mindetti profılaktıkalyq egýler júrgiziletin aýrýlardyń tizbesin, olardy júrgizý qaǵıdalaryn, merzimderin jáne halyqtyń profılaktıkalyq egilýge jatatyn toptaryn bekitý týraly» qaýlyǵa ózgerister engizý týraly» qaýlyǵa súıenedi.
Shyn máninde qaýlyda bas tartýǵa bolmaıtyn májbúrli vaktsınatsııa týraly aıtylmaǵan.
– Vaktsınatsııa erikti túrde júrgiziledi, ıaǵnı azamattar ekpe alýǵa óz erkimen kelisim berýi tıis, – dep túsindirdi QR Densaýlyq saqtaý mınıstrligi.
Budan basqa, 2020 jylǵy 7 shildedegi «Halyq densaýlyǵy jáne densaýlyq saqtaý júıesi týraly» kodekste burynǵydaı QR kez kelgen azamatynyń «Emdelýge jáne basqa da medıtsınalyq aralasýlardy, onyń ishinde profılaktıkalyq egýlerdi júrgizýge habardar etilgen kelisim berýge nemese bas tartýǵa» quqyǵy bar normalar saqtalǵan. 16 jastaǵy jáne odan asqan balalardyń profılaktıkalyq jáne konsýltatsııalyq-dıagnostıkalyq kómek alýdan habardar túrde bas tartýǵa quqyǵy bar.
