Qazaqstandyqtar kópbalaly otbasy bolý qalpynan ketip barady - demograf
ASTANA. QazAqparat - Ekonomıkalyq zertteý ınstıtýtynyń áleýmettik-demografııalyq damýdy zertteý ortalyǵynyń dırektory Batjan Aqmoldına qazaqstandyq qoǵamdaǵy demografııalyq tendentsııa týraly aıtyp berdi, dep habarlaıdy QazAqparat tilshisi.
«Biz bala týý men ólim-jitimi joǵary kórsetkishke ıe elden bala týý men ólim-jitimi tómen kórsetkishke ıe elge aınalyp kelemiz. Bul demografııalyq aýysym dep atalady. Damyǵan elder 50-60 jyl buryn basyp ketken álemdik tendentsııa bizdiń elde jyl sanap aıqyn baıqalýda. Bizde dástúrli bala týý kórsetkishiniń tómendeýimen bul protsess anyq baıqalady. Saýalnama júrgizip, jastardan qansha balaly otbasy bolǵyń keledi dep suraǵanymyzda, jartysynan kóbi 2-3 bala dep jaýap beredi. Odan artyq bala tabýdy jón kórmeıdi», - dedi ol Astanada ótken «Qazaqstandyq qoǵamdy jańǵyrtý protsesindegi otbasynyń róli» atty dóńgelek ústel otyrysynyń aldynda.
Sarapshynyń aıtýynsha, buǵan áleýmettik-ekonomıkalyq faktorlar sebep bolyp otyr.
«Adamdarǵa: «Bala sanyn josparlaý kezinde materıaldyq jaǵdaı esepke alynýy kerek pe?» degen suraq qoıyldy. Saýalnamaǵa qatysýshylardyń 83 paıyzy bul suraqqa «ıá» dep jaýap berip otyr. Demek, biz dástúrli qalyptan aýytqyp baramyz. Biz dástúrdi ustanǵan azııalyq memleket bolǵanymyzǵa qaramastan, demografııalyq aýysymnyń tendentsııasy bizde aıqyn baıqalyp keledi», - deıdi ol.
Batjan Aqmoldına sonymen qatar, Qazaqstanda jastardyń ajyrasý jaǵdaıy kórshiles elderden qaraǵanda kóp ekenin atap ótti.
«TMD elderiniń ishinde Ózbekstan, Tájikstan sekildi memleketterdeı nekege turý kórsetkishi bizde joǵary bolǵanymen, ol eldermen salystyrǵanda Qazaqstanda ajyrasý jaǵdaıy kóp kezdesedi. Demek, bizde otbasy ınstıtýty dástúrden tys tegeýrinderge tap bolǵan. Ajyrasý jaǵdaılarynyń kóp bolǵany - demografııalyq aýysymǵa da ózindik áserin tıgizip jatyr», - deıdi ol.
