Qazaqstandyqtar kóp tańdaıtyn kólikterdiń 10 modeli jarııalandy
NUR-SULTAN. QazAqparat – Qazaqstan avtobıznes qaýymdastyǵy 2020 jylǵy qarashada Qazaqstanda 8 186 jeńil avtokólik pen jeńil kommertsııalyq tehnıka satylǵanyn jarııa etti, dep habarlaıdy QazAqparat tilshisi.
«Naryq 24 paıyzdyq ósimdi kórsetip otyr. Suranysy joǵary modelder bolmasa dıllerler baǵany saqtap, ońtaıly usynystardy kúshinde qaldyrý úshin tutynýshylarmen aldyn ala kelisim jasasady. Aldaǵy eki aptada boljam boıynsha kólik satý kórsetkishi ósýi kerek», - deıdi Qazaqstan avtobıznes qaýymdastyǵynyń vıtse-prezıdenti Anar Maqasheva.
Qarasha aıynda jeńil avtokólikterdiń ishindegi suranysqa eń kóp ıe markasy Hyundai bolyp shyqty. Almatydaǵy jańa Hyundai Trans Kazakhstan zaýytynyń ashylýynyń arqasynda dıllerler 2 166 avtokólik satyp (ótken jyldyń qarashasyndaǵy kórsetkishten 30 paıyzǵa kóp), rekordqa jetti. Al «SaryarkaAvtoProm» kompanııasynyń Chevrolet markaly kólikterinen qarashada 865 dana (ekinshi oryn) satylsa, Lada satylǵan 1 193 kóligimen úshinshi orynnan kóringen. Toyota markaly kólikten ótken aıda 719 ǵana satyldy (-43%). Dese de japon kólikteri tórtinshi orynda tur. Odan keıingi markalardyń tiziminde Kia (506; +1%), Volkswagen (297; +313%), JAC (296; +107%), Nissan (274; +15%) Renault (223; -15%) jáne Ravon (151) ornalasqan.
Modelder turǵysynan Chevrolet Nexia birinshi orynnan kórindi. Satylǵan 8 myńnan asa kóliktiń 1 004 danasy osy kólik. Qazaqstandyqtar kóp satyp alǵan kólikterdiń ishinde odan keıingi oryndarda Hyundai Accent (982), Chevrolet Cobalt (619), Lada Granta (606), Hyundai Tucson (524), Hyundai Creta (369), Kia Rio (333), Toyota Camry (312), Lada 4x4 (296) jáne Volkswagen Polo (252) tur.
