Qazaqstandyqtar kommýnaldyq qyzmetter úshin 5 mlrd. teńgege jýyq qaryz
ASTANA. QazAqparat - Qazaqstandyqtardyń kommýnaldyq qyzmetter úshin 5 mlrd. teńgege jýyq qaryzy bar.
Bul týraly búgin QR Úkimeti otyrysynda elimizdiń Ulttyq ekonomıka mınıstri Qýandyq Bıshimbaev aıtty.
«2016 jylǵy 20 qyrkúıektegi jaǵdaı boıynsha tutynýshylardyń kommýnaldyq qyzmetter úshin bereshegi 4 724,5 mln. teńgeni quraıdy. Almaty qalasynyń ákimdigi bereshekti 1 323,6 mln. teńgege tómendetýge qol jetkizdi. Eń kóp debıtorlyq bereshek mynadaı óńirlerde saqtalyp otyr: Almaty qalasy 2 015,5 mln. teńge; Astana qalasy 957 mln. teńge; Qostanaı oblysy 382,0 mln. teńge; Ońtústik Qazaqstan oblysy 290,0 mln. teńge; Shyǵys Qazaqstan oblysy 280,0 mln. teńge», - dedi ol.
Jalpy, mınıstrdiń aıtýynsha, jylytý maýsymyna daıyndyq bekitilgen josparǵa sáıkes júrgizilip jatyr jáne turaqty baqylaýda tur.
«Aǵymdaǵy jyldyń 15 qazanyna deıin barlyq nysandardyń jylytý maýsymyna daıyndyǵyn aıaqtaý jáne qýaty saǵatyna 100 Gkal deıingi jylý kózderin normatıvtik otyn qorymen qamtamasyz etý qajet ekenin eskere otyryp, oblystardyń, Astana jáne Almaty qalalarynyń ákimdikteri jylytý maýsymyna daıyndyq máselesin turaqty baqylaýda ustaýǵa tıis», - dep atap ótti Q.Bıshimbaev.
