Qazaqstandyqtar kólikterdiń qandaı markalaryna qumar
NUR-SULTAN. QazAqparat – 2019 jyldyń qańtar-qarashasynda Qazaqstanda resmı dılerler 63 404 avtomobıl satty. Bul osydan bir jyl burynǵy kórsetkishten 20,8 paıyzǵa joǵary, dep habarlaıdy QazAqparat tilshisi.
«Qazavtoóndiris» Qazaqstan avtomobıl salasy kásiporyndary odaǵy málimetinshe, atalǵan kezeńde qazaqstandyqtar jańa jeńil kólik satyp alýǵa 588,8 mlrd teńge qarajattaryn jumsaǵan. Bul 2018 jylǵy kórsetkishten 31,1 paıyzǵa kóp. Al osy jyldyń qarasha aıynyń ózinde ǵana 66,4 mlrd teńgeniń 7 373 kóligi satyldy.
2019 jyldyń 11 aıynda qazaqstandyq avtozaýyttarda shyǵarylǵan ónimge 36 726 adamnyń tańdaýy tússe, satylǵan 26 678 kólik shetelde qurastyrylǵan.
«Osy jyldyń qańtar-qarashasynyń qorytyndysy boıynsha suranysy joǵary qazaqstandyq brendterdiń reıtıngin Lada bastap tur. Respýblıka aýmaǵynda reseılik markanyń 13 671 avtomobıli satylǵan. 13 105 Hyundai modeli óz ıesin tapty. Úshinshi orynda 13 031 birligi satylǵan Toyota markasy tur. Úzdik bestik qatarynda KIA (3 192 birlik) men Ravon (2 899) kólikteri de bar. Sonymen qatar TOR-10 ótimdi markalardyń qataryna Renault (2 383), GAZ (2 239), Nissan (2 145), UAZ (1 735 ) jáne Volkswagen (1 605) kiredi», - dep atap ótedi «Qazavtoóndiristen».
Bıylǵy jyly myna óńirlerdiń turǵyndary jańa avtokólikterdi kóp satyp alǵan: Almaty qalasy (16 981 avtomobıl satyldy), Nur-Sultan (12 447), Shymkent (4 998), Atyraý (4 048), Qaraǵandy (3 883), Qostanaı (3 648), Oral (2 713), Óskemen (2 564), Pavlodar (2 286) jáne Aqtaý (2 266).
