Qazaqstandyqtar qolda bar kredıtin ótegennen góri jańa avtonesıe alýǵa qumar - taldaý
NUR-SULTAN. QazAqparat - Birinshi kredıttik bıýronyń FCBAnalytics taldaý ortalyǵy avtonesıe naryǵyna arnalǵan aqparattyq taldaý jarııalady, dep habarlaıdy QazAqparat.
Qazaqstanda 2015 jyldan bastap jeńildikpen avtonesıe berý baǵdarlamasy jumys isteıtini belgili. 6 jylda Qazaqstannyń Damý banki baǵdaralamaǵa 82 mlrd teńge baǵyttaǵan. Bıyl bul maqsatqa 20 mlrd teńge bólinip otyr.
«Qazaqstan damý bankiniń derekteri boıynsha 2015 jyldyń kókteminen bastap 2021 jyldyń sáýir aıynyń sońyna deıin jalpy somasy 139,6 mlrd teńgege 27,5 myńǵa jýyq kredıt berilgen. Bul osy ýaqyt aralyǵynda berilgen avtonesıelerdiń jalpy sanynyń 10,2% jáne jalpy somasynyń 12,9% quraıdy», - dep jazylǵan aqparattyq-taldamada.
FCBAnalytics málimetine sensek, Qazaqstanda avtonesıege degen suranys ósip keledi. 2021 jylǵy qańtar-sáýir aralyǵynda berilgen qaryzdar sany ótken jyldyń uqsas kezeńimen salystyrǵanda 24,3% joǵary bolǵan. 4 aıda jalpy somasy 132,7 mlrd teńgege 27 588 avtonesıe berilgen.
«Bul, óz kezeginde, portfeldiń ósýine alyp keldi. Qazaqstandyqtar qolda bar nesıelerdi ótegennen góri jańa avtonesıe alýǵa qumar. Avtonesıeleý portfeliniń jalpy kólemi 12 aıda 36,5% artyp, 818,1 mlrd teńgege jetti. Eń joǵary ósý qarqyny – ońtústik óńirlerde, eń tómeni-respýblıkanyń batysynda», -deıdi FCBAnalytics sarapshylary.
Avtonesıege degen suranyspen birge merzimi ótken boryshtyń sany da qatar ósip otyr. 2021 jylǵy 1 mamyrdaǵy jaǵdaı boıynsha, merzimi ótken qaryzdar kólemi 74,2 mlrd teńgege (9,1%), onyń ishinde 90 jáne odan da kóp kún merzimi ótken qaryzdar – 44,1 mlrd teńgege (5,4%) jetken.
FCBAnalytics atldaýynda aıtylǵandaı, bankter úshin avtonesıe áli de bolsa asa tabysty ónim bolyp sanalmaı otyr. Osynyń saldarynan eldegi avtopark aıtarlyqtaı eski kúıinde qalyp otyr.
Ulttyq statıstıka bıýrosynyń derekteri boıynsha, respýblıkada tirkelgen jeńil avtomobılderdiń 64,3%-yna 10 jyldan asqan.
«4 aıdyń qorytyndysy boıynsha elde shyǵarylǵan jeńil avtomobılderdiń kólemi 8,5% ósti. Degenmen, Qazaqstan dástúrli túrde avtomobılderdiń taza netto-ımporttaýshysy bolyp otyr. 2021 jyldyń I toqsanynyń qorytyndysy boıynsha kólik eksportynan túsken árbir dollarǵa ımportqa jumsalǵan 18 dollar kelgen», - dep jazylǵan taldaýda.
