Qazaqstandyqtar kóbinese qandaı dári-dármektiń jaǵymsyz áserine tap bolady
2018 jyldyń 9 aıynda Farmatsııa komıteti aýmaqtyq departamentiniń farmatsevtıkalyq qyzmeti 898 obektige tekserý júrgizdi, onyń ishinde jospardan tys tekserý - 231. Sonyń nátıjesinde 260 quqyqbuzýshylyq anyqtaldy.
«Ústimizdegi jyldyń 1 qarashasyna deıin 2282 dárilik zattyń jaǵymsyz áseri jóninde belgili boldy. Sonyń ishinde 77 fakti boıynsha munyń sońy aýyr jaǵdaıǵa aparyp soqqan. Osyǵan baılanysty 19 is qaralyp, 18 dári satylymnan alynyp tastaldy», - dedi QR Densaýlyq mınıstrligi Farmatsııa komıtetiniń tóraıymy Lıýdmıla Bıýrabekova OKQ-de ótken baspasóz máslıhatynda.
Onyń aıtýynsha, 9 aı ishinde komıtettiń aýmaqtyq fılıaldarynda dári-dármek daýyna qatysty 102 ákimshilik is qozǵalyp, shamamen 8 137 160 teńge somaǵa aıyppul salyndy. Budan basqa, anyqtalǵan kemshilikter boıynsha prokýratýra organdaryna - 15, ákimshilik sotqa - 6, ІІM organdaryna - 5, memlekettik kirister departamentine - 1, óńirlik densaýlyq saqtaý basqarmasyna - 9, qoǵamdyq densaýlyqty qorǵaý departamentine - 1 materıal jiberilgen.
«Eń kóp kemshilik dárilik zattardy, medıtsınalyq buıymdardy saqtaý tártibin oryndamaý, dári men buıymdardy jáne medıtsınalyq tehnıkany satyp alý, qamtamasyz etý, esepke alý qaǵıdalaryn buzý, kóterme jáne bólshektep ótkizý jáne jaramdylyq merzimi ótken dárilik zattardy joıý qaǵıdalaryn buzý oqıǵalary boıynsha anyqtaldy. El azamattarynyń eń kóp tirkelgen jaǵymsyz áseri - propofol men ketamın dárileri, bular narkoz kezinde qoldanylady», - dedi komıtet basshysy.
Aıta ketsek, elimizde 2005 jyldan bastap medıtsınalyq uıymdarda dárilik zattardyń jaǵymsyz áserlerine monıtorıng júrgizilip otyrady.