Qazaqstandyqtar klımat jónindegi Jastar forýmynda úzdik dep tanyldy

GLAZGO. QazAqparat - Shotlandııanyń Glazgo qalasynda klımattyń ózgerýimen eresekter ǵana emes balalar da kúresip jatyr. Eki aptaǵa sozylatyn Birikken Ulttar Uıymynyń 26-shy konferentsııasynyń Jastar forýmyna qazaqstandyq jastar da qatysyp, olar «Eń úzdik art shara» atalymy boıynsha úzdik dep tanyldy, dep habarlaıdy QazAqparat tilshisi.

Sýret avtorlary qazaqstandyq jas balalar. Elde buǵan deıin uıymdastyrylǵan «Meniń jasyl ǵalamsharym» jáne «Janýarlar meniń dosym» atty baıqaýlardyń jeńimpazy atanǵan. Sandyq formattaǵy sýretter Glazgo qalasynda qaǵazǵa shyǵarylyp, halyqaralyq forým kórermenderine usynyldy.

«Jumystardyń negizgi taqyryby - ekologııa jáne qorshaǵan orta. Barlyǵy da júrekke jyly tıedi. 8 ben 17 jas aralyǵyndaǵy balalar ǵalamdyq problemalar týraly habardar ekendigi erekshe áserlendirdi. Konferentsııa sońynda qorytyndy shyǵarylyp, meni 3000-nan astam delegattardyń arasynan «Eń kreatıvti» dep tańdady», - deıdi kórmeniń art dırektory, 17 jastaǵy Sofııa Gamazova.

Sofııa jáne Dıana - Almatydaǵy 48 lıtseı mekteptiń 11 synyp oqýshysy. Klımattyń ózgerýimen kúres boıynsha BUU konferentsııasynyń jastarǵa arnalǵan forýmy týraly áleýmettik jeli arqyly bilip, qatysýǵa shaqyrý alǵan. Uıymdastyrýshy tarap arnaıy grant bólgip, egiz qyzdyń jol shyǵyndaryn kótergen. Forýmda Dıanaǵa Qazaqstan qoryqtary týraly lektsııa ótkizý mindeti júktelgen. Odan bólek ol maskalarǵa qorshaǵan ortaǵa qamqorlyqpen qaraýǵa shaqyratyn messedj jazýdy úıretetin sheberlik sabaǵyn júrgizgen.

«Maskaǵa kók muhıttyń sýretin salyp, ony plastık qaqpaq jáne kámpıttiń qaǵazymen toltyrýǵa bolady. Osylaısha betperdedegi beıneler arqyly halyqty qorshaǵan ortany lastamaýǵa shaqyryp, kúrmeýli máselege nazar aýdartýǵa bolady», deıdi forým qatysýshysy Dıana Gamazova.

Sofııa men Dıana mektep bitirgen soń, ekologııaǵa qatysty mamandyqtardy meńgerip, Qazaqstandaǵy qorshaǵan ortany qorǵaý problemalarymen aınalysýdy josparlap otyr.

Bıyl Klımattyń ózgerýimen kúres boıynsha BUU konferentsııasy janyndaǵy jastar forýmy 16 jyl qatarynan ótkizilip keledi. Onyń basty ereksheligi - óskeleń urpaq ózderiniń resmı paıym-pikirlerin BUU ókilderine tikeleı jetkize alýynda. Shara nátıjesinde jastar baǵdarlamalyq qujat daıyndap, álem kóshbasshylarynyń talqylaýyna joldaıdy.