Qazaqstandyqtar kimniń kınosyna mıllıondap aqsha salyp jatyr
ASTANA. QazAqparat - Elimizde jyl saıyn kınoprokattan 70 mıllıon AQSh dollary jınalady, dep xabarlaıdy QazAqparat tilshisi.
"Respýblıka boıynsha ornalasqan kınoteatrlarda jyl saıyn 300-den astam fılm kórsetiledi. Sonyń ishinde otandyq kınonyń sany shamamen 12 fılmdi quraıdy. Jalpy kınoprokattan túsetin aqshanyń sommasy 70 mıllıon dollarǵa jetti", - dedi QR Mádenıet jáne sport mınıstrliginiń departament basshysy Ermek Raxymov búgin "Eýrazııa" kınofestıvali aıasyndaǵy zııatkerlik menshikti qorǵaýǵa arnalǵan jıynda.
Onyń aıtýynsha, prokatta otandyq kıno az bolsa da, ózimizde túsirilgen fılmderdiń sany birte-birte artyp keledi. Ol fılmderdiń basym bóligi "Qazaqfılm" kınostýdııasynda túsiriledi.
Resmı málimetke sáıkes, búginde Qazaqstanda 93 kınoteatr bar. Al kınozaldardyń jalpy sany 300-ge taıap qaldy. Statsıonarly kınoqurylǵylardyń sany da az emes, 370 danany quraıdy.
Aıta keteıik, búgin "Eýrazııa" kınofestıvali aıasynda ótken taǵy bir sektsııada Qyrǵyzstannyń kınematografıster odaǵynyń tóraǵasy, rejısser Sadyq Sher-Nııaz kınony birlesip damytýdy usyndy. Onyń aıtýynsha, Gollıvýd fılmderinen bas tartyp, Qazaqstan, Qyrǵyzstan, Ózbekstan, Grýzııa sııaqty elderdiń ortaq kınonaryǵyn qalyptastyrýǵa bolady .
