Qazaqstandyqtar kez kelgen aýrýhanada tegin medıtsınalyq qyzmet ala ala ma
ALMATY. QazAqparat – «Áleýmettik medıtsınalyq saqtandyrý qory» QeAQ medıtsınalyq kómektiń sapasyn baqylaý departamentiniń dırektory Lázzat Shomanova «Kez kelgen aýrýhanada medıtsınalyq kómekti tirkeýsiz tegin alýǵa bola ma?» degen suraqqa jaýap berdi, dep habarlaıdy QazAqparat tilshisi.
«Eger siz qandaı da bir jekemenshik aýrýhanada tirkelgen bolsańyz, siz tirkelmegen basqa aýrýhanalar sizge qyzmet kórsetýge mindetti emes. Sebebi tirkeý jeke menshik jáne memlekettik aýrýhanalarǵa birdeı júredi. Eger sizdi jekemenshik aýrýhana tirkegen bolsa, onda sizdiń aqshańyz júredi», - dep jaýap berdi ol.
Sonymen qatar Lázzat Shomanova aýrýhanańyzda keıbir medıtsınalyq kómek túrleri bolmasa, ne isteý kerektigi jónindegi suraqqa jaýap qaıtardy.
«Mundaı jaǵdaıda siz shaǵymdana alasyz. Bul pozıtsııa jaramsyz. Siz ózińizdiń medıtsınalyq kómekti tolyq kólemde alý quqyǵyńyzdy bilýińiz kerek. Eger siz osy aýrýhanaǵa tirkelgen bolsańyz jáne jarna tólep otyrsańyz, TMKKK qarajatynan basqa sizge konsýltatsııalyq-dıagnostıkalyq qyzmetter, qajettilik týyndasa, barlyq stantsıonarlyq qyzmetter men joǵary tehnologııalyq medıtsınalyq kómek túrinde Medıtsınalyq saqtandyrý qorynyń qarajaty qarastyrylǵan», - dedi ol.
Onyń aıtýynsha, adamdy ózine tirkegen aýrýhana oǵan tolyǵymen jaýap berýi kerek. Sonymen qatar ol tirkelýdiń mańyzyna toqtaldy.
Odan bólek, Lázzat Shomanova basqa qalada aýyryp qalsańyz, ne isteý kerektigin aıtty.
«Eger siz basqa qalada aýyryp qalsańyz, jáne bul shuǵyl jaǵdaı bolsa, sizge kómekti tegin kórsetedi. Eger bul josparly tekseris bolsa, óz aýrýhanańyzǵa qaralǵanyńyz jón», - dep qosty spıker.
