Qazaqstandyqtar qazan aıynda AQSh dollaryn 6,6%-ǵa az satyp alǵan
ASTANA. QazAqparat - 2016 jylǵy qazanda halyqtyń aıyrbastaý pýnktterinde qolma-qol AQSh dollaryn netto-satyp alý kólemi 304,0 mln. AQSh dollaryn qurady.
2016 jylǵy tamyzdaǵy maýsymdyq kúrt ósýinen keıin shetel valıýtasyna degen suranys qazanda tómendedi. Qyrkúıekpen salystyrǵanda halyqtyń qolma-qol AQSh dollaryn netto-satyp alýy 6,6%-ǵa qysqardy. Bul týraly QR UB baspasóz qyzmetinen habarlady.
Tutastaı alǵanda aǵymdaǵy jyl halyqtyń qolma-qol AQSh dollaryn satyp alý kóleminiń aıtarlyqtaı tómendeýimen sıpattalady. Máselen, ótken jyldyń qazanymen salystyrǵanda kórsetilgen shetel valıýtasyn netto-satyp alý kólemi 40,1%-ǵa, al 2014 jylǵy qazanmen salystyrǵanda 84,0%-ǵa qysqardy.
2016 jylǵy 10 aıda AQSh dollaryn netto-satyp alý 2015 jylǵy qańtar-qazandaǵy kólemnen 10,5 eseden asa az boldy, bul 2001 jyldan bergi búkil baqylaý kezeńindegi eń tómen kórsetkish bolyp tabylady. Halyqtyń AQSh dollaryn jalpy satý kólemi sońǵy 5-6 jyldaǵy ortasha deńgeıde, al halyqtyń AQSh dollaryn jıyntyq satyp alý kólemi eki eseden asa azaıdy. Osylaısha, halyqtyń qolma-qol AQSh dollaryna degen suranysynyń tómendeý úrdisi jalǵasýda.
