Qazaqstandyqtar qazan aıynda 3 myńnan astam altyn quıma satyp aldy
ALMATY. QazAqparat – El turǵyndary 2020 jyldyń qazan aıynda ekinshi deńgeıli bankterden jáne banktik emes aıyrbastaý pýnkterinen jalpy salmaǵy 127,6 keli, 3 066 altyn quıma satyp aldy, dep habarlaıdy QazAqparat tilshisi.
Ulttyq banktiń málimetinshe, 2017 jyldan bastap jalpy salmaǵy 1,37 tonna bolatyn 37 754 altyn quıma satyldy.
Altyn quımalary 5, 10, 20, 50 jáne 100 gramdyq bolyp bes salmaqta satylǵan. Sonyń ishinde eń kóp satylǵany 10 gramdyq quıma.
Satylǵan barlyq quımanyń ishindegi onyń úlesi 25%, ıaǵnı, 9 505 dana. Odan keıin 100 gramdyq quıma – 8 524 dana (23%), 20 gramdyq – 8 514 dana (22%), 5 gramdyq – 6 667 dana (18%) jáne 50 gramdyq quıma – 4 544 dana (12%).
Quımalardy satyp alý jaǵynan Almaty qalasy kósh bastap tur (satylǵan quımalardyń jalpy sanynan 53%), odan keıin Atyraý (13%), Nur-Sultan (11%) jáne basqa óńirler (23%) boldy.
«Keri satyp alýǵa jalpy massasy 3,2 kg 128 ólsheýish quıma qabyldandy. Altyn quımalar – ınvestıtsııalaýdyń senimdi quraly bola alady. Bankterdiń jáne banktik emes aıyrbastaý pýnkteriniń klıentke «sol kúni» aqsha tóleı otyryp, quımalardy keri satyp alý múmkindigi – altyn quımalar naryǵynyń ótimdiligin qamtamasyz etýdiń negizgi faktory»,– dep habarlady Ulttyq bank.
Qazir altyn quımalardy Halyk Bank-ten, Eýrazııalyq Bankten, Jýsan Bank-ten, Bank TsentrKredıtten, sondaı-aq banktik emes aıyrbastaý pýnktterinen satyp alýǵa jáne olarǵa keri satýǵa bolady.
Árbir quıma qorǵanysh elementterimen jabdyqtalǵan (quımalardyń bet jaǵy aınadaı, mıkromátin jáne bederli gýrt), sonymen birge quımalardy mehanıkalyq zaqymdanýdan qorǵaıtyn jáne qaptamasynyń ashylǵan-ashylmaǵanyn tez anyqtaýǵa múmkindik beretin arnaıy qaptamada shyǵarylady. Qorǵanysh qaptamasy da quıma sapasynyń sertıfıkaty sanalady. Sondyqtan quımany uqypty saqtap, qaptamasyn ashpaǵan durys.
