Qazaqstandyqtar qaı elderge jıi aqsha aýdarady
NUR-SULTAN. QazAqparat – Halyqaralyq aqsha aýdarý júıesi arqyly tranzaktsııalardyń kólemi Qazaqstannan shetelge jáne shetelden elimizge keletin qarajat kóleminiń bir jyl ishinde aıtarlyqtaı óskenin kórsetti, dep habarlaıdy QazAqparat tilshisi ranking.kz-ke silteme jasap.
«2019 jyldyń qańtar-tamyzynda shetelge jiberilgen aqsha aýdarymynyń kólemi 7,4 paıyzǵa artyp, 408,3 mlrd teńgege jetti. Al shetelden 232,5 mlrd teńge alynyp, jyl ishindegi ósim 5,4 paıyz boldy. Qazaqstannan jiberilgen jáne shetelden alynǵan kólem boıynsha TOP-5 eldiń qataryna Reseı, Ózbekstan jáne Qyrǵyzstan kirip otyr», - delingen taratylǵan aqparatta.
Shetelge jiberilgen aqshanyń 134,5 mlrd teńgesi Reseıge jóneltilip, ol jaqtan 81,1 mlrd teńge alynǵan. Ekinshi orynda turǵan Ózbekstanǵa 88,5 mlrd teńge jiberilip, ol jaqtan qazaqstandyqtar 17,3 mlrd teńge alǵan. Al Qyrǵyzstanǵa Qazaqstannan 52 mlrd teńge jóneltilip, ol jaqtan qazaqstandyqtardyń qolyna 15,7 mlrd teńge túsken.
Qazaqstandyqtar Túrkııaǵa 55,1 mlrd teńge, Qytaıǵa 22,1 mlrd teńge jibergen. Al Ońtústik Koreıadan Qazaqstanǵa 38,3 mlrd teńge, AQSh-tan 10,5 mlrd teńge jóneltilgen.
