Qazaqstandyqtar qatysqan armııalyq halyqaralyq oıyndardyń alǵashqy nátıjesi belgili boldy

NUR-SULTAN. QazAqparat - Qazaqstan komandasy Armııalyq halyqaralyq oıyndar sheńberinde ótip jatqan «Elbrýs sheńberi» konkýrsynda birinshi kezeńniń eki arnaıy tapsyrmasyn oryndaý nátıjesi boıynsha ekinshi orynǵa turaqtady. Reseı komandasy kósh bastap tur, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Alǵashqy konkýrstyq saıystar barysynda qatysýshylar jasandy taý bederine shabýyl jasap, taýly jerde baǵdarlaýdy pysyqtady. Birinshi kezeń sheńberinde jaýyngerler taǵy úsh arnaıy tapsyrmany oryndaıtyn bolady.

Úsh kezeńnen turatyn konkýrstar barysynda qatysýshylar arnaıy tapsyrmalardy oryndaıdy. Eń kúrdelisi ekinshi kezeń bolmaq. Onda áskerı qyzmetshiler bıik taý jaǵdaıynda marsh jasaıdy. Al úshinshi kezeńde olar Elbrýs shyńyn baǵyndyrmaq. Onyń bıiktigi – 5 642 metr.

Jarysqa toǵyz elden kelgen komandalar qatysýda. Olar – Abhazııa, Armenııa, Úndistan, Qazaqstan, Qytaı, Pákistan, Reseı, Ózbekstan jáne Ońtústik Osetııa.

Halyqaralyq konkýrsta el namysyn Qazaqstan Qarýly Kúshteriniń atynan Taýdaǵy daıarlyq ortalyǵynyń áskerı alpınısteri qorǵaıdy. Jarys Kabardın-Balqardaǵy (RF) «Terskol» taýdaǵy polıgonynda ótýde.