Qazaqstandyqtar qarjy pıramıdalaryna 27 mlrd teńgeden astam aqsha quıǵan

NUR-SULTAN. QazAqparat – 17 myńnan astam salymshy 27 mlrd teńgeden asyp túsetin aqshany qarjy pıramıdalaryna salǵan, dep habarlaıdy QazAqparat tilshisi QR Qarjy monıtorıngi agenttiginiń baspasóz qyzmeti usynǵan málimetke súıene otyryp.

«Bıylǵy jyldyń 5 aıynda qarjy monıtorıngi organy QR QK 217-baby (qarjy pıramıdasyn qurý jáne oǵan basshylyq etý) boıynsha 24 qarjy pıramıdasy áreketine qatysty sotqa deıingi tergep-tekserý amalyn júrgizdi. Atalǵan faktiler boıynsha qarjy pıramıdalaryna 17 myńnan astam salymshy 27 mlrd teńgeden astam qarajat quıǵany belgili boldy», - delingen resmı aqparatta.

Sondaı-aq, agenttik qarjy pıramıdasyn uıymdastyrý boıynsha kúdikke ilingen kompanııalarǵa qatysty artyq málimettiń berilmeıtinin eskertedi.

«QR Qylmystyq-protsestik kodeksiniń 201-babyna sáıkes sotqa deıingi tergep-tekserýge qatysty derekterdi jarııa etýge bolmaıdy. Derekter tergeý múddesine qaıshy kelmegen jáne basqa adamdardyń quqyǵy men zańdy múddesin buzbaǵan jaǵdaıda prokýrordyń ruqsatymen ǵana jarııa etilýi múmkin», - deıdi vedomstvodan.

Eske sala ketsek, Qazaqstanda qarjy pıramıdalarynyń jarnamasy úshin qylmystyq jaýapkershilik engizý josparlanyp otyr.

QR Іshki ister mınıstrliginiń málimetinshe jyl basynan beri qarjy pıramıdalarynyń ústinen 27 qylmystyq is qozǵalǵan.