«Qazaqstandyqtar qaryzǵa ómir súrip jatyr» - baspasózge sholý
***
«Egemen Qazaqstan» gazetiniń búgingi sanynda «Bankterdiń bılep-tósteýine tosqaýyl qashan qoıylady?» degen taqyryppen maqala jarııalandy. «Ekonomıkanyń qan tamyryna aınalǵan bankterdiń qoǵamnyń damýyndaǵy róli óte zor. Ony osydan 7 jyl buryn AQSh-ta ıpotekalyq nesıeden bastalǵan álemdik qarjy daǵdarysynyń saldary aıqyn kórsetip otyr. Álemdik qoǵamdastyqtyń bir múshesi retinde odan Qazaqstan da syrt qalmady. Jalpy, qarjylyq qyzmetti elimizde bankterden basqa, ıpotekalyq kompanııalar, nesıelik seriktestikter, uıymdar, qaýymdastyqtar, odaqtar jáne faktorıngtik, forfeıtıngtik, lızıngtik kompanııalar men mıkronesıelik uıymdar da usyna alady. Sarapshylardyń aıtýynsha, qazir qarjylyq qyzmetti usynýshylardyń el ómirine dendep engeni sonsha, qazaqstandyq árbir úshinshi otbasy nesıege táýeldi bolýda. Sondyqtan nesıelik júıeniń basty qatysýshylary bolyp tabylatyn bankterdiń qyzmetine qatysty syn da kún ótken saıyn kóbeıip kele jatyr», - dep jazady maqala avtory.
Davosta Dúnıejúzilik ekonomıkalyq forým aıasynda Memleket basshysy Nursultan Nazarbaev «Arselor Mıttal» kompanııasynyń basqarma tóraǵasy Lakshmı Mıttalmen kezdesti, dep jazady «Egemen Qazaqstan» gazeti juma kúngi sanyndaǵy «Birlesip izdegenniń utary kóp» degen taqyryptaǵy maqalasynda.
«Nursultan Nazarbaev pen Lakshmı Mıttal kompanııanyń elimizdegi metallýrgııa salasyn damytýǵa qatysýy, kombınattyń Temirtaýdaǵy qyzmeti, sondaı-aq, túrli ınvestıtsııalyq jáne áleýmettik jobalardyń iske asyrylýynyń aspektilerin qarastyrdy.
Kompanııanyń Qazaqstandaǵy kásiporyndarynyń jumysyna, sonyń ishinde óndiris kóleminiń tómendeýi men jumysshylar sanynyń qysqarýyna baılanysty birqatar problemalyq máseleler sóz boldy.
Memleket basshysy bul máselelerdi qarastyryp, olardy sheshý joldaryn Qazaqstan Úkimetimen birlesip izdeý qajettigin atap ótti», - delingen materıalda.
***
«Aıqyn» basylymy sońǵy jyldary qarapaıym halyq tutynýǵa qajetti nesıelerge kóp ıek arta bastaǵandyǵyn jazyp, qynjylys bildirip otyr. Soǵan oraı, depýtattar alańdaýshylyq bildirip jatqan kórinedi.
«Bul tóńirektegi másele qoǵam nazaryn aýdara bastady. Tipti el aralaǵan halyq qalaýlylary da jurttan jaǵymsyz jaǵdaılardy estidi me, Parlament tórinen de qaryz máselesin kóterdi. «Memlekettiń qaryzǵa ómir súrýi qaýipti» dedi kúni keshe Kýzmın Májilistiń jalpy otyrysynda. Premer-Mınıstr men Ulttyq bank tóraǵasyna saýal joldaǵan ol: «Depýtattyq saýalymnyń sebebi halyqtyń ekinshi deńgeıdegi bankterge tutynýshylyq qaryzynyń kúrt ósýi bolyp otyr. Osy kórsetkish 2013 jylǵy 1 jeltoqsandaǵy jaǵdaı boıynsha 2,2 trıllıon teńgeni qurady. Tek qana bir kúntizbelik jyl ishinde, 2012 jyl men 2013 jyldyń qarasha aılary arasynda tutynýshylyq qaryz 48% ósip, 701 mlrd teńgeni qurady» dedi», - dep jazylǵan «Qazaqstaqstandyqtar qaryzǵa ómir súrip jatyr» taqyrybymen berilgen maqalada.
Sonymen qatar osy basylymnyń alǵashqy betinde atalmysh taqyrypqa oraı, «Tólem qabileti tómen azamattarǵa keshirim jasalýy qajet pe?» degen saýal tóńireginde tanymal qarjygerlerdiń pikirleri berilgen.
***
«Maıdanda oq atylyp, adam óldi» dep jazady «Túrkistan» basylymy. ıAnýkovıch bul tyǵyryqtan qalaı shyǵady? Atalmysh gazet tilshisiniń maqalasy álem jurtshylyǵyn eleńdetip otyrǵan osy oqıǵanyń jaı-japsaryn keńinen qamtýǵa tyrysqan.
***
«Kazahstanskaıa pravda» juma kúngi sanynda elimizde ǵylymnyń damýyna arnalǵan birqatar túıtkildi máselelerdi kóterip otyr. «Naýke nýjna molodej» degen taqyryppen jaryq kórgen maqalanyń avtory - QR BǴM Ekonomıka ınstıtýtynyń professory, Nıý-Iork ǵylym akademııasynyń múshesi Bolat Qusaıynov. Onyń aıtýynsha, qazirgi tańda Qazaqstanda 4230 ǵylym doktory bar. Degenmen onyń tek 25 paıyzy ǵana zertteý jumystarymen aınalysady. Bul úrdisti ǵylymnyń mártebesin ósirý arqyly, jastardy kóptep tartý negizinde joıý qajet dep esepteıdi professor.
