Qazaqstandyqtar karantınde DSM usynystaryn oryndaı ma – áleýmettik saýalnama

NUR-SULTAN. QazAqparat - QR Prezıdenti janyndaǵy Qazaqstan strategııalyq zertteýler ınstıtýty qazaqstandyqtardyń karantın jaǵdaıynda Densaýlyq saqtaý mınıstrliginiń usynystaryn oryndaı ma, joq pa degen saýalnama nátıjelerin usynady, dep habarlaıdy QazAqparat Qazaqstan strategııalyq zertteýler ınstıtýtynyń baspasóz qyzmetine silteme jasap.

Psıhologııa turǵysynan alǵanda, deni saý eresek adamnyń jeke basynyń krıterııleriniń biri – bul óz ómiri men qabyldaǵan sheshimderi úshin jeke jaýapkershilikti alý qabileti. Bir jyldan astam ýaqyttan beri biz koronavırýstyq pandemııaǵa baılanysty karantındik shekteýlermen ómir súrip kelemiz. Osy ýaqyt ishinde árqaısymyzdyń ómirimiz, kózqarasymyz, tipti qundylyqtarymyz da ózgerdi. Densaýlyq saqtaý turǵysynan, eń aldymen, kóp nárse adamnyń ózine baılanysty. Sondyqtan da áleýmettanýshylardy qyzyqtyrǵan mańyzdy máselelerdiń biri – el azamattarynyń Densaýlyq saqtaý mınıstrliginiń usynystaryn oryndaýy týraly másele boldy.

Áleýmettanýlyq zertteýdiń nátıjeleri boıynsha respondentterdiń jartysynan astamy saýalnama júrgizý kezinde karantın jaǵdaıynda árdaıym basty usynystardy oryndaıtyndyǵyn aıtqan. Qoǵamdyq oryndarda qorǵanysh maskany kıip júrý boıynsha jaǵdaı eń jaǵymdy kórsetkishke ıe. Respondentterdiń 80,9%-y árdaıym osy erejeni ustanady, al 17,8%-y keıde ony saqtaıdy, al keıde saqtamaıdy. Al qoǵamdyq oryndarda maska kımeıtinder - barlyq respondentterdiń 1%-nan az.

Barlyq respondentterdiń jartysynan astamy aýrýǵa shaldyqqan jaǵdaıda ózin-ózi oqshaýlaıdy, dezınfektsııalaýshy zattardy qoldanady jáne týystarymen jeke baılanysyn shekteıdi. Shamamen árbir ekinshi respondent árdaıym basqalardan 1,5-2 metr qashyqtyqty saqtaıdy jáne kóshede júrýdi shekteıdi.

Sondaı-aq, bizdiń aramyzda qorǵaýdyń qajetti normalaryn BARLYQ KEZDE saqtamaıtyndardyń da úlesi jetkilikti ekenin atap ótken jón. Mysaly, shamamen árbir úshinshi respondent otbasylyq is-sharalarǵa qatysa otyryp, týystarymen aralasýdy jalǵastyrady, sonymen qatar aýyrǵan jaǵdaıda ózin-ózi oqshaýlaý rejımin árdaıym saqtaı bermeıdi.