Qazaqstandyqtar karantın ýaqytynda etti kóp jeıtin bolǵan - statıstıka
Qazaqstannyń respýblıkalyq angýs palatasy sharýalardyń eldegi etke degen suranysty qanaǵattandyrýǵa daıyn ekenin habarlaıdy. Palata usynyp otyrǵan statıstıkaǵa súıensek, Qazaqstanda 2020 jyldyń qańtar men mamyr aılarynda 681,2 myń tonna qoı men qus eti satylǵan. Bul – 2019 jyldyń uqsas kezeńimen salystyrǵanda 21,3 myń tonnaǵa artyq. Agrarshylar karantın ýaqytynda da, TJ kezinde de eldiń azyq-túlik qaýipsizdigin qamtamasyz etý úshin bir sátke jumysty toqtatqan emes.
«Et jáne et ónimderi - qazaqstandyqtardyń azyq-túlik qorjynyndaǵy mańyzdy ıngredıentterdiń biri. Eń tómengi azyq-túlik sebet qunynyń 35%-y et pen balyqqa jumsalady. Qazaqstandyq fermerler ishki suranysty tolyǵymen qanaǵattandyryp qana qoımaı, sonymen qatar eksporttyq naryqqa da shyǵýǵa daıyn. Salanyń eksporttyq áleýetin halyqaralyq sarapshylar moıyndap otyr: Dúnıejúzilik bank mal sharýashylyǵyn turaqty damytý baǵdarlamasyn básekege qabiletti sıyr etin óndirýdi qoldaý úshin Qazaqstanda júzege asyrǵaly otyr», - delingen habarlamada.
Qazaqstannyń respýblıkalyq angýs palatasynyń dırektory Dáýren Salyqovtyń aıtýynsha, Dúnıejúzilik banktiń bul baǵdarlamasy et óndirisin arttyryp qana qoımaı, halyqty jumyspen qamtýda úlken ról atqarady.
«Qazaqstandaǵy mal sharýashylyǵy turaqty ekonomıkalyq ósimge yqpal etedi. Búginde elimizde 20 myń otbasylyq sharýashylyq bar. Іri bordaqylaý alańdarymen yntymaqtastyq arqyly Aýyl sharýashylyǵy mınıstrligi 10 jyl ishinde onyń sanyn 100 myńǵa deıin arttyrýǵa nıetti. Mal sharýashylyǵymen aınalysatyndar sany da 100-den 600 myńǵa deıin ósýi kerek», - deıdi palata basshysy.
Palatanyń málimetinshe, sıyr etiniń óndirisi jylyna eki ese – 1 mln 100 myń tonnaǵa deıin artýy kerek. Al eksport jyl saıyn 2,4 mlrd AQSh dollaryn ákelýi tıis.
