Qazaqstandyqtar qara qurlyqtaǵy Ebolla bezgegimen kúreske attanýǵa nıetti - baspasózge sholý
***
Keshe Ortalyq kommýnıkatsııalar qyzmetinde Atyraý oblysynyń ákimi Baqtyqoja Іzmuhambetov respýblıkalyq buqaralyq aqparat quraldarynyń ókilderimen kezdesip, olardy oblystyń áleýmettik-ekonomıkalyq jaǵdaıymen, salalyq baǵdarlamalardyń jáne Elbasy tapsyrmalarynyń oryndalý barysymen tanystyrdy. Osy jaıt arqaý bolǵan maqala «Egemen Qazaqstan» gazetiniń senbilik sanynda «Áleýmettik salaǵa úlken betburys bar» degen taqyryppen berildi. Basylymnyń jazýynsha, óńirdegi aýyl sharýashylyǵy óndirisi 32,4 mıllıard teńgeni quraǵan. «Bıznestiń jol kartasy-2020» baǵdarlamasy boıynsha 1 trıllıon 587 mıllıard teńge bólingen. Investıtsııalar kólemi 783,2 mıllıard teńge bolǵan. 333,9 myń sharshy metr turǵyn úı paıdalanýǵa berilgen. Ortasha aılyq eńbekaqy kólemi 220,8 teńgege jetip, ótken jylǵydan 17,8 paıyzǵa artqan. Inflıatsııanyń deńgeıi 5,5 paıyzdy qurasa, oblys bıýdjetine 199,9 mıllıard teńge qarjy túsken. «Osy rette, ákimge Atyraý oblysynan jalpy bıýdjetke túsetin qarjy kólemi suraldy. Onyń aıtýynsha, munaıdan túsetin qarjynyń barlyǵy Ulttyq qor men respýblıkalyq bıýdjetke aýdarylady eken. Derekter kitapshasynda bul jaıynda Ulttyq qorǵa 1 trıllıon 320,6 mıllıard teńgeniń aýdarylǵandyǵy, memlekettik bıýdjetke 462,6 mıllıard teńge somasynda tólemder men salyqtar jınalyp, onyń 356,3 mıllıard teńgesi respýblıkalyq bıýdjetke aýdarylǵandyǵy keltirilipti», - dep jazady basylym.
«Keshe Ortalyq kommýnıkatsııalar qyzmetinde qazaqstandyq qoǵamnyń rýhanı jáne mádenı damýyna arnalǵan brıfıng jalǵasyn tapty. Bul joly Senat depýtaty, Ekonomıkalyq saıasat, ınnovatsııalyq damý jáne kásipkerlik komıtet hatshysy Sársenbaı Eńsegenov qoǵamǵa mańyzdy degen birqatar máselelerdi ortaǵa saldy», - dep jazady «Egemen Qazaqstan» gazeti senbilik sanyndaǵy «Rýhanı jáne mádenı damý - órkenıet ólshemderiniń biri » degen taqyryptaǵy maqalasynda. S.Eńsegenovtiń atap ótýinshe, Memleket basshysy Nursultan Nazarbaevtyń suhbatty Ulytaý jerine arnaıy baryp berýinde úlken mán-maǵyna bar. «»Ulytaý - elimizdiń kindik ortasy ǵana emes, ári qazaqtyń qasıetti jeri de. Elbasynyń oı-tujyrymdary ata-babalarymyz rýhynyń búgingi kúngi ómir súrip jatqan jastarǵa rýh qosyp, olardyń patrıottyq sana-sezimderin arttyrýǵa beretin adamı-psıhologııalyq turǵydan da óte utymdy shara. Ulytaýda ótken kezdesýdiń barysynda Prezıdent tarıhymyzdy tereń zerttep, bilý qajet ekenimizdi atap kórsetti. «Óz halqynyń tarıhyn, salt-dástúri men tilin bilmegen eldiń bolashaǵy bulyńǵyr», degen sózdi aıtýy da sondyqtan», - dedi senator.
***
«Qazaqstannyń birqatar dárigerleri Ekvatoraldy Afrıkadaǵy beıbitshilikti qutqarý úshin attanýǵa nıet tanytyp otyr», - dep jazady «Ekspress K» gazeti senbilik sanyndaǵy «Gde ý vas ebolıt» degen taqyryptaǵy maqalasynda. Basylymnyń jazýynsha, Afrıkaǵa attaný úshin halyqaralyq uıymnyń bazasyna tirkelý qajet. Buǵan qosa, dáriger bolý mindetti de emes. Máselen, BUU-ǵa erikti retinde tirkelýge bolady. BUU eriktileriniń shamamen 40 paıyzy qara qurlyqta jumys isteıdi.
***
«Kazahstanskaıa pravda» gazetiniń jazýynsha, elimizdiń úkimettik emes uıymdary óz jumystarynyń ustanymdaryn ózgertpek. Basylymnyń jazýynsha, bul jaıynda elordada ótken halyqaralyq konferentsııada belgili bolǵan. Alqaly jıynda ÚEU qyzmetterine qatysty barlyq máseleler egjeı-tegjeıli talqyǵa túsken. Konferentsııa qatysqan sarapshylar qaıyrymdylyq jáne metsenattyq qyzmetti damytý salasyndaǵy tájirıbelerin ortaǵy salyp, atalǵan baǵytty Qazaqstanda damytýdyń problemalary jáne perspektıvalaryna qatysty oı bólisken.
