Qazaqstandyqtar qańtar aıynda 2,4 myń altyn quıma satyp aldy

NUR-SULTAN. QazAqparat - 2021 jyldyń qańtar aıynda qazaqstandyqtar ekinshi deńgeıli bankterden jáne jekelegen banktik emes aıyrbastaý pýnkterinen jalpy salmaǵy 111,5 keli bolatyn 2 414 quıma satyp aldy. QazAqparat bul týraly QR Ulttyq bankine silteme jasap habarlaıdy.

Ulttyq bank halyqqa tazartylǵan altyn quımalardy satý jáne satyp alý baǵdarlamasyn 2017 jyly qolǵa alǵan bolatyn. Baǵdarlama júzege asyryla bastaǵannan beri jalpy salmaǵy 1,68 tonna 44 993 altyn quıma satyldy.

Altyn quımalardyń bes túri usynylǵan: 5, 10, 20, 50 jáne 100 gramm. Tazartylǵan altyn quımalardy satý jáne satyp alý baǵdarlamasy iske asyrylǵaly halyq arasynda eń kóp suranysqa ıe bolǵany – 10 gramdyq quıma. Jalpy satylymdaǵy onyń úlesi 26% – 11 654 dana. Odan keıin 100 g. quıma - 10 572 dana (23%) jáne 20 gramm - 10 123 dana (22%), 5 gramm - 7 177 dana (16%), 50 gramm - 5 467 dana (12%).

Málim bolǵandaı, ólshengen quımalar Almaty, Nur-Sultan jáne Atyraý qalalarynda suranysqa ıe.

Altyn quımalar senimdi ınvestıtsııalyq qural bola alady. Ár quıma qorǵanys elementterimen (quımalardyń aına beti, mıkrotekst jáne releftiń sheti), quımalardy mehanıkalyq zaqymdanýdan qorǵaıtyn jáne pakettiń ashylǵan-ashylmaǵanyn tekserýdi jeńildetetin arnaıy qaptamada shyǵarylady. Qorǵanys qaptamasy, sonymen qatar quımanyń sapa sertıfıkaty bola alady. Sondyqtan quımany saqtaǵanda muqııat bolyp, oramany ashpaǵan jón.

«Qazirgi ýaqytta altyn quımalardy Halyk Bank-te, Eýrazııalyq bankte, Jýsan Bank-te, Bank TsentrKredıtte, sondaı-aq banktik emes aıyrbastaý pýnkterinde satyp alýǵa jáne satýǵa bolady», - dep naqtylady Ulttyq bankten.