Qazaqstandyqtar qansha zeınetaqy jınady

ASTANA. QazAqparat - Bıylǵy shildeniń basynda qazaqstandyqtardyń zeınetaqy jınaqtarynyń kólemi 8,4 trln teńgege jetti. Bul týraly Senat depýtattarymen ótken kezdesýde «Biryńǵaı jınaqtaýshy zeınetaqy qory» AQ Basqarma tóraıymy Nurbúbi Naýryzbaeva málim etti, dep habarlaıdy QazAqparat tilshisi.

«Bıylǵy 1 shildedegi jaǵdaı boıynsha zeınetaqy jınaqtarynyń kólemi 8,4 trln teńgege jetip, onyń ishinde 63 paıyzy jarnalar esebinen, 37 paıyzy ınvestıtsııalyq kirister esebinen qalyptasty», - dedi Naýryzbaeva.

Onyń sózine qaraǵanda, 2017 jyl men 2018 jyldyń birinshi jartyjyldyǵynyń qorytyndysy boıynsha, zeınetaqy aktıvteriniń kiristiligi ınflıatsııa qarqynynan joǵary tur.

«Jalpy, zeınetaqy jınaq júıesiniń barsha qyzmeti kezinde jınaqtalǵan kiristilik deńgeıi 481,1 paıyzdy qurady. Bul óz kezeginde jınaqtalǵan ınflıatsııa (474,2 paıyzy) deńgeıinen artyq. Atap aıtqanda, zeınetaqy jarnalary boıynsha ońtaıly qarqyn baıqalyp otyr», - dedi N. Naýryzbaeva.

Budan buryn habarlanǵandaı, Qazaqstanda zeınetaqy jınaqtary boıynsha erlerdiń úlesi basym.

Máselen, mindetti zeınetaqy jınaqtary turǵysynda 9,2 mln shottyń 53 paıyzy - erlerge (4,9 mln), al qalǵan 47 paıyzy (4,3 mln) áıelderge tıesili bolyp otyr.