Qazaqstandyqtar qandaı kólik markalaryn unatady
«QazAvtoÓnerkásip» Qazaqstannyń avtomobıl salasy kásiporyndary odaǵynyń málimetinshe, osy jyldyń úsh aıynda jalpy somasy 139,5 mlrd teńgeni quraıtyn 18 836 avtokólik shyǵaryldy. Naqty mánde shyǵarylǵan kólik quraldarynyń jalpy kólemi ótken jylǵy kórsetkishten 2,1 esege asyp otyr.
Atap aıtqanda, jeńil avtomobıl óndirisi eki ese ósip, 16 651 kólik qurastyryldy. Avtobýs shyǵarý da 82,6 paıyzǵa artyp, úsh aıda 272 birligi jolǵa shyqty. Al júk kólikterin qurastyrý 8,1 ese artyp otyr. Atalǵan kezeńde 1 663 júk kóligi qurastyrylǵan. 2020 jyldyń naýryzynda qazaqstandyq kásiporyndardyń konveıerinen 6 229 avtokólik shyqty. Bul, 2019 jylǵy kórsetkishten 2,2 ese kóp.
Jyl basynan beri otandyq avtozaýyttar 11 593 kólik quralyn satty. Al respýblıka turǵyndary jergilikti óndiristen shyqqan kólikterdi satyp alýǵa 83,6 mlrd teńge aqshalaryn jumsaǵan. Bul, bir jyl burynǵy kórsetkishten 70,3 paıyzǵa artyq.
Qazaqstandyqtardyń arasynda osy jyldyń birinshi toqsanynda suranysqa ıe bolǵan kólikter mynalar: Lada (3 513 birlik.), Hyundai (3 094), KIA (1 924), Ravon (1 354) jáne JAC (179).
Munan bólek, otandyq kásiporyndar usynatyn kólik markalarynyń qataryna Skoda (133 birlik) Chevrolet (119) jáne UAZ (68) kiredi. Esepti kezeńde Lada Granta (1 628 birlik), Ravon Nexia R3 (1 354), KIA Rio (1 205), Hyundai Tucson (1 081) jáne Lada Vesta (937) kólikteri kóp satylǵan.
Hyundai Creta (683 birlik), Hyundai Accent (560), Lada Largus (510), KIA Sportage (422) jáne Hyundai Elantra (419 ) kólikterine de suranys joǵary.
