Qazaqstandyqtar Qanat Nurtazınovty aqtyq saparǵa shyǵaryp saldy

Qaraqshynyń oǵynan ajal qushqan tabıǵat qorǵaýshysymen qoshtasýǵa qaraqurym halyq jınaldy. Marqumnyń týystary men dostary, áriptesteri, jerlesteri - barlyǵy júr. Qanyshty aqtyq saparǵa shyǵaryp salý kezinde jınalǵan qaýym onyń ádilet pen zańdy árdaıym alǵa qoıǵan erjúrek jan bolǵanyn aıtty.

«Elbasy men Prezıdent atynan, barlyq qazaqstandyqtar atynan Qanysh Nurtazınovtyń týǵan-týystary men jaqyndarynyń qaıǵysyna ortaqtasyp, kóńil aıtamyn. Memleket basshysy osy qaıǵyly oqıǵany estigen bette qylmystyq isti jeke baqylaýǵa alyp, ishki ister mınıstrine tıisti tapsyrmalar berdi. Qanysh bizge Otanǵa degen adaldyq, qyzmettik boryshyn oryndaý kezindegi janqııarlyq úlgisin kórsetti. Biz ekologııa mınıstri Maǵzum Myrzaǵalıevpen birge osy qaıǵyny bólisip, demeý úshin keldik», - dedi Qaraǵandy oblysynyń ákimi Erlan Qoshanov.

Memleket basshysynyń Jarlyǵymen Qanysh Nurtazınov qaıtys bolǵannan keıin І dárejeli «Aıbyn» ordenimen marapattaldy. Prezıdent atynan QR Ekologııa mınıstri Qaraǵandy oblysy ákimimen birge qaza bolǵan qoryqshynyń otbasyna memlekettik nagradany tabys etti.

Marqum ınspektordyń otbasy materıaldyq kómek alady. Erlan Qoshanov sondaı-aq Prezıdenttiń tapsyrmasy boıynsha batyrdyń erligi máńgi este qalatynyn aıtty. Ulytaý aýdanyndaǵy kóshelerdiń birine Qanysh Nurtazınovtyń esimi beriledi.

«Búgin rýhy myqty, adal da erjúrek, qaısar er, elimizdiń abyroıly azamaty Qanysh Serikulyn sońǵy saparǵa attandyrǵaly turmyz. Kóńili jarqyn, sertine berik, ǵumyryn shynaıy eńbekke arnaǵan Qanysh Serikulynyń ǵumyry nebári 43 jasynda úzildi. Bul jaǵdaı - biz úshin orny tolmas qaıǵy. Barlyǵymyzdyń qabyrǵamyz qaıysyp otyr. Elbasy Nursultan Nazarbaev, prezıdent Qasym-Jomart Toqaev bul qaıǵyǵa ortaqtasyp, shynaıy kóńil aıtyp jatyr. Osyndaı er minezdi azamat tárbıelegen ata-ana, týǵan-týys, januıasyna sheksiz alǵys aıtamyz. Artynda qalǵan anasyna, jubaıyna, bes balasyna Alla qýat berip, meıirimin tóge kór deımiz. Prezıdenttiń tapsyrysymen qoldan kelgen barlyq kómek-qoldaý jasalatynyna kepil beremiz. Nurtazınov Qanysh Serikuly 2016 jyldyń qańtarynan bastap Ohotzooprom mekemesine Ortalyq aımaqtyq fılıaldyń ınspektory bolyp qyzmetke qabyldandy. Osy ýaqyt aralaǵynda óte jaýapty, adal qyzmet atqaryp, áriptesteri arasynda úlken qurmetke, bedelge ıe boldy», - dedi QR Ekologııa mınıstri Maǵzum Myrzaǵalıev.

Marqum qoryqshy 43 jasta edi. Áskerden keıin quqyqtyq bilim alyp, óz ómirin tártip salasymen baılanystyrǵan. Birneshe jyl týǵan aýylynda ýchaskelik ınspektor bolyp jumys istedi. Úsh jyl buryn ishki ister organdarynan otstavkaǵa shyqqannan keıin tabıǵat qorǵaý qyzmetine aýysqan.

Eske sala keteıik, Qanysh Nurtazınov áriptesimen birge aqbóken aýlaǵan qaskúnemderdi quryqtamaq bolǵan. Oqıǵa Aqmola oblysynyń Jarqaıyń aýdanynda oryn aldy. Qoryqshylarǵa qarsy oq atqan brakonerler bir ınspektordy óltirip, ekinshisin aýyr jaraqattaǵan bolatyn. Atalmysh oqıǵa ІІM baqylaýyna alynyp, qylmyskerlerdi quryqtaý boıynsha tıisti sharalar qoldanyldy. Al Prezıdent qaza bolǵan qoryqshynyń otbasyna memleket tarapynan kómek kórsetiletinin aıtty.

Jerlesiniń qaza bolǵany týraly taraǵan qaıǵyly habar árbir qoskóldiktiń qabyrǵasyn qaıystyrdy. Aýyl turǵyndary ony jeke qaıǵysy retinde qabyldap, Qanyshtyń otbasyn qoldaý úshin birigip, kómekterin aıamady.

«Bizdiń aýyl shaǵyn. Bárimiz bir-birimizdi bilemiz. Qanysh keremet meıirimdi jáne aqjarqyn adam edi. Ony barlyǵymyz qurmetteýshi edik. Biz Prezıdent Qasym-Jomart Toqaevqa Qanyshymyzdyń týǵandary jáne aýyldastarymen birge qaıǵymyzǵa ortaqtasyp, kóńil aıtqany úshin alǵysymyzdy bildiremiz. Marapattaý týraly sheshim durys jáne ádil dep sanaımyz. Árıne, bul ballalar úshin ákesiniń, áıeline jubaıynyn ornyn toltyrmaıdy. Biraq olardy osy bir aýyr qasiretimen jalǵyz qalmaǵanan kórsetýde. Qoryqshylyq jumys óte qaýipti jáne memleket deńgeıinde adam ómirin qorǵaý úshin sharalar qabyldaý qajet», - deıdi Qoskól turǵyny Hamzat Janalınov.

Qoshtasý rásiminen keıin baqılyq bolǵan qoryqshynyń denesi týǵan jerine aparyp jerlendi.