Qazaqstandyqtar Qadyr túnin shildeniń 13-inen 14-ine qaraǵan túni kútedi
ASTANA. QazAqparat - Qazaqstandyqtar Qadyr túnin shildeniń 13-inen 14-ine qaraǵan túni kútedi. Bul týraly búgin Qazaqstan musylmandary dinı basqarmasynyń Naıb múftıi, «Nur Astana» ortalyq meshitiniń bas ımamy Naýryzbaı qajy Taǵanuly málim etti.
«Alla Taǵala Ramazan aıy jóninde qasıetti Quranda arnaıy súre túsirdi. Ol súrede Qadyr túni jaıynda aıtty. Alla Taǵala Quran Kárimde: «Biz qasıetti Qurandy Qadyr túninde túsirdik. Bul tún myń aıdan da qaıyrly», deı otyryp, Qadyr túniniń mańyzdylyǵyn bizge baıan etti. Bul túnniń mańyzdylyǵy sonshalyq, osy túnniń qurmetine búkil perishteler jerge túsip, Allanyń árbir pendesiniń tilegine «ámın» deıdi eken. Tań atqanǵa deıin perishteler Allanyń quldaryna tilekshi bolyp turady. Bıyl Qadyr túni shilde aıynyń 13-inen 14-ine qaraǵan túnge tuspa-tus keledi. Alla buıyrtsa, 13 shildeden 14 shildege qaraǵan túni Qadyr túnin qarsylap ótkizemiz», - dedi Naýryzbaı qajy Taǵanuly.
