Qazaqstandyqtar Iran men Ońtústik Koreıadan qandaı jaǵdaıda evakýatsııalanady

NUR-SULTAN. QazAqparat – Qazaqstan azamattary koronavırýs ınfektsııasy ýshyqqan Iran men Ońtústik Koreıa elderinen ázirge evakýatsııalanbaıdy. Bul týraly búgin Úkimettiń baspasóz ortalyǵynda ótken brıfıngte QR Syrtqy ister mınıstriniń birinshi orynbasary Shahrat Nuryshev málim etti, dep habarlaıdy QazAqparat tilshisi.

«Iran men Ońtústik Koreıa boıynsha: Iranda qazirgi tańda 170 azamatymyz bar. Evakýatsııa týraly ázirge másele joq. Degenmen, bizdiń elshilik ondaǵy azamattarymyzben tıisti jumysty júrgizip jatyr», - dedi Shahrat Nuryshev.

Otandastarymyz Irannan qaıtýdy jón dep sheshken jaǵdaıda mınıstrlik olarǵa tıisti kómekti bermek.

«Ońtústik Koreıada Qazaqstannyń 34 myń 600 azamaty bar. Ol jaqqa baǵyttalǵan reıster sany toǵyzdan úshke qysqartyldy. Ondaǵy otandastarymyz elge qaıtýdy jón dep sheshse, qaıtyp kelsin degen oımen osy reıster qaldyryldy», - dedi ol.

Onyń aıtýynsha, qıyn jaǵdaı týyndasa ǵana otandastarymyzdy evakýatsııalaý jumystary júrgiziledi.

«Sol sebepti qaıtýǵa nıetti azamattar ázirge júrip turǵan reıster arqyly elge orala alady», - dedi vıtse-mınıstr.