Qazaqstandyqtar ınternette kóbine qandaı taýarlardy satyp alady
Satu.kz: Onlaın-satylymnyń ortasha túbirtegi - 35 myń teńge
Satu.kz - 142 myń ınternet-kásipker eńbek etetin marketpleıs. Aı saıyn atalmysh alańǵa 3,1 mln qazaqstandyq enip, saýda jasaıdy. Marketpleıste 8,4 mln taýar satylady.
Satu.kz usynǵan málimetke sáıkes, 2018 jyldyń alǵashqy jartyjyldyǵynda qazaqstandyqtar bul jerde 13,1 mlrd teńgeniń, ıaǵnı ótken jyldyń salystyrmaly kezeńine qaraǵanda 23 paıyzǵa artyq aqshanyń saýdasyn jasaǵan. Munda tapsyrystardyń sany 22 paıyzǵa - 376 myńǵa deıin artqanymen, onlaın-satylymnyń ortasha túbirtegi 35 myń teńge mólsherinde saqtalǵan.
Satylym kóshbashsysy - opa-dalap.
Marketpleıstegi TOP-5 taýardy atap ótsek: olar - sándik jáne densaýlyqqa arnalǵan taýarlar, úı men balabaqshaǵa arnalǵan taýarlar, medıtsınalyq taýarlar, tehnıka men elektronıka, balalarǵa arnalǵan taýarlar bolyp otyr.
Sándik jáne densaýlyqqa arnalǵan taýarlardyń ishinde sózsiz - bet pen shashqa arnalǵan opa-dalaptar, medıtsınalyq taýarlarda - qolǵaptar, bir rettik kıimder men aıaq kıimder kóp satylady. Úı men balabaqshaǵa arnalǵan taýarlardyń ishinde suranysy joǵarylardyń qataryna as úı ydysy, as úıdiń qajettilikteri, baý-baqshada egýge arnalǵan gúlder men jemister ıe. Tehnıka jáne elektronıkada turmystyq tehnıkanyń aksessýarlary kósh bastap tur.
Munda satyp alýshy kim?
Satu.kz-tiń málimetine súıensek, onlaın-satyp alýshylardyń kóbi Almatyda (marketpleıske enýshilerdiń shamamen 40 paıyzy) turady. Ekinshi orynda - 21 paıyzdyq kórsetkishpen Astana qalasy tur. Basqa qalalar men óńirlerde onlaın-shopıngtiń damý qarqyny baıaý.
Satyp alýshylardyń kóbi - 25-30 jas aralyǵyndaǵy jastar. 2018 jyldyń alǵashqy jartyjyldyǵynyń kórsetkishine sensek, 55-64 jas jáne 65 jastan asqandardyń aýdıtorııasy 35-49 paıyzǵa ósken kórinedi. Dese de, jasy úlkenderdiń onlaın-satylymǵa den qoıatyndarynyń mólsheri jalpy kórsetkishtiń 5,5 paıyzyn ǵana quraıdy.
Qazaqstandyqtardyń kóbi taýardy qolyndaǵy smartfondarymen izdeýdi qolaı kóredi.
Taýarlardyń ishinde tanymaly qandaı?
Satu.kz marketpleısiniń eń tanymal segmentterinde myna kategorııadaǵy taýarlap joǵary suranysqa ıe: avtokólikter men olardyń saımandary, avtotıýnıngke arnalǵan aksessýarlar, motor maılary, avtokólik kýzovynyń aksessýarlary men dóńgelekter.
Jıhazdardyń ishinde qazaqstandyqtar kóbinese jatyn bólmeniń jıhazdaryn, úrlemeli jıhazdy, qonaq úıge arnalǵan jıhazdardy izdeıdi. Qurylys materıaldardyń ishinde jylý ótkizgish materıaldar, lakpen boıaý materıaldary, kesý materıaldary, armatýra, qaqpa, qorshaý, shlagbaýmdar kóptep satylyp jatyr. Kıimderden qazaqstandyqtar kóbinese onlaın-satylym arqyly kúndelikti kıetin krossovkalar men kedalardy, sport pen demalysqa arnalǵan kıimderdi, fýtbol formasyn, arnaıy aıaq kıimderdi, jumys kıimderin satyp alǵysy keledi.
OLX: satylymnyń jartysy - mobıldik qosymsha arqyly
Uıaly telefondardyń statıstıkasy OLX esebinde anyq kórsetilgen. Atalmysh ınternet-alańnyń málimetine súıensek, «telefondar men aksessýarlar» kategorııasynda kóbinese - iPhone, iPhone 6, iPhone 7, Samsung, Xiaomi markalary joǵary surasynqa ıe bolyp otyr. Usynystardyń sandary boıynsha eń tanymal marka - Samsung (24 415) bolsa, ekinshi orynda Apple (21 508). Habarlamalar boıynsha úshinshi jáne tórtinshi oryndy Huawei men Xiaomi bólisken.
Eń basym suranysqa ıe vakansııa - júrgizýshi
Mańyzdy bólimderdiń biri - izdeý. Búgingi tańda Qazaqstannyń onlaın-alańynda eń joǵary suranysqa ıe mamandyq - júrgizýshi bolyp otyr. TOP-5 suranysqa ıe vakansııalardyń ishine satýshy, tazalyqshy, bala kútýshi men júk tasýshy enedi. Sonymen birge, «izdeý» bóliminde «eden jýýshy», «daıashy» jáne «esepshi» dep terip jazatyndardyń sany kóp eken.
Álbette, árdaıym baqylanyp otyratyn suranystardyń biri - páterler. Servısti qoldanýshylar páterlerdi satyp alý úshin nemese saǵattap, aptalap nemese táýlikke, uzaq merzimge jaldap alý úshin izdeıdi.
«Kolesa Krysha Market»: Satýshylar 20 paıyzǵa jeńildi jasaıdy
«Kolesa Krysha Market» sarapshylaryna qulaq túrsek, servısti qoldanýshylar kóbinese baǵaǵa kelisýge erekshe den qoıatyn kórinedi. Satýshylar satýshylarǵa kóp jaǵdaıda ortaq baǵaǵa kelisý týraly usynyspen jıi qońyraý shalyp, taýar kóbinese bastapqy baǵasynan 20 paıyz tómen baǵaǵa satylyp ketedi eken.
Sonymen birge, sarapshylar qoldanylǵan taýarlar suranystar boıynsha, usynystar boıynsha da kóptep artyp kele jatqanyn erekshe atap ótedi. Atalmysh segment sońǵy jylda 3 esege artqan. Sonymen birge, «úı men saıajaıǵa arnalǵan» bólimderine degen qyzyǵýshylyq eki jarym esege, «hobbı jáne demalysqa» 2,2 esege, «balalarǵa» bóligine 1,5 esege artqan.
