Qazaqstandyqtar ınternet arqyly taýar satyp alý kezinde óte saq bolǵan jón
ASTANA. QazAqparat - QR UEM Tutynýshylardyń quqyqtaryn qorǵaý komıteti ınternet jelisinde taýar satyp alý kezinde óte saq bolýdy suraıdy. Bul týraly QazAqparat komıtettiń baspasóz qyzmetine silteme jasap habarlady.
«Tutynýshylardyń quqyqtaryn qorǵaý komıtetiniń mekenjaıyna elektrondyq saýda kezindegi alaıaqtyqqa qatysty kóptegen shaǵymdar kelip túsetindigin jáne ınternet jelisinde josyqsyz satýshylarǵa qatysty kóptegen teris pikirler bar ekendigin tutynýshylardyń nazaryna jetkizemiz. Elektrondy qyzmetpen qoldanatyn tutynýshylardyń shaǵymdaryna sáıkes atalǵan sýbektiler qoldanýǵa jaramsyz, málimdelgen talaptarǵa, sondaı-aq modeli, óndirýshisi sáıkes kelmeıtin sapasyz jáne jalǵan taýarlardy ótkizedi, sonymen qatar satýshydan eshqandaı keri baılanys joq. Komıtet ınternet jelisinde sýbektilerdiń ataýy men satýshynyń (daıyndaýshy, oryndaýshy) ornalasqan jeri (zańdy mekenjaıy) týraly aqparat joq ınternet saıttarynda taýarlardy satyp almaýdy suraıdy. Komıtet ınternet jelisinde taýar satyp alý kezinde óte saq bolýdy suraıdy. Qazirgi ýaqytta Komıtet atalǵan baǵytta sharalar qabyldaý boıynsha tıisti jumys júrgizýde», - dep jazylǵan habarlamada.
