Qazaqstandyqtar HQKO-ǵa kezekti smartfon arqyly brondaı alady

NUR-SULTAN. QazAqparat – Halyqqa qyzmet kórsetý ortalyǵy men Mamandandyrylǵan HQKO-ǵa kezekti eGovMobile qosymshasy arqyly tapsyrys berýge nemese qaıta brondaýǵa bolady, dep habarlaıdy QazAqparat tilshisi.

Ol úshin eń jaqyn ornalasqan HQKO/Mamandandyrylǵan HQKO-ny jáne kelýge yńǵaıly kún men ýaqytty tańdaý kerek. Qyzmetti paıdalaný úshin eGovMobile qosymshasynyń «Arnaıy qyzmetter» bóliminde «Kezekti onlaın brondaý» degendi tańdaý qajet.

«Ulttyq aqparattyq tehnologııalar» AQ Basqarma tóraǵasy Áset Turysovtyń aıtýynsha, HQKO-na kezekti brondaýdy barynsha jeńildetý atalǵan qyzmetti júzege asyrýdaǵy basty maqsat boldy.

«Biz paıdalanýshylarymyzdyń kompıýterge árdaıym kirýge múmkindigi bolmaıtynyn jáne qosymsha arqyly kezekke turý yńǵaıly ári jyldam ekenin túsinip, qyzmetti qosymshaǵa shyǵarý týraly sheshim qabyldadyq», - dedi Á.Turysov.

Sondaı-aq, qosymshada birneshe qyzmetti tańdaý múmkindigi qarastyrylǵan. ıAǵnı, qazaqstandyqtar bir ret barý úshin úsh qyzmetke deıin ala alady. Eger azamatqa birneshe qyzmet alý kerek bolsa, kelý maqsatyn tańdap, «Birneshe qyzmetter berý» tarmaǵyn belgileý qajet. Sodan keıin brondaý kezinde oǵan kóp ýaqyt bólinedi.

Budan basqa, qosymshada azamattar «Mindetti áleýmettik saqtandyrý júıesine qatysýshyǵa áleýmettik aýdarymdardyń jaǵdaıy men qozǵalysy týraly aqparat berý» jańa qyzmetin paıdalana otyryp, ózderiniń áleýmettik eseptemelerin teksere alady. Anyqtamany birneshe mınýt ishinde alýǵa bolady.

Al «Quqyqtyq kómek» bóliminde «Qazaqstan Respýblıkasy Іshki ister mınıstrliginiń Arnaıy memlekettik muraǵatynan muraǵattyq anyqtamalardy jáne/nemese muraǵattyq qujattardyń kóshirmelerin alý» qyzmetin tańdap, muraǵattan qujattardyń kóshirmelerin alýǵa múmkindik bar.

Qosymshada Elektrondyq úkimettiń 70-ten astam suranysqa ıe qyzmeti jáne tsıfrlyq qujattardyń 6 túri iske asyrylady. EGovMobile mobıldi qosymshasy GooglePlay jáne AppStore-da júkteýge qoljetimdi.