Qazaqstandyqtar Fýtzaldan álem chempıonatyn tikeleı efırde tamashalaıdy
NUR-SULTAN. QazAqparat - 12 qyrkúıek pen 3 qazan aralyǵynda Lıtvada fýtzaldan Álem chempıonatynyń fınaldyq kezeńiniń oıyndary ótedi, dep habarlaıdy QazAqparat tilshisi.
Týrnırge 6 topta barlyǵy 24 komanda qatysady. Qazaqstan quramasy A tobynda Lıtva, Kosta-Rıka, Venesýela komandalarymen oınaıdy.
Pleı-off kezeńine ár toptan alǵashqy eki oryn alǵan quramalar men 3-oryn ıelegender arasynan 4 úzdik komanda shyǵady.
Toptyq kezeń 12-20 qyrkúıek aralyǵynda ótedi. Pleı-off 1/8 fınaldyń matchtarymen 22-24 qyrkúıekte bastalady. Shırek fınaldar 26-27 qyrkúıekte, jartylaıfınaldyq oıyndar 29-30 qyrkúıek kúnderi ótedi. Fınal men úshinshi oryn úshin match 3 qazanǵa josparlanǵan.
«Qazsport» telearnasy Qazaqstan quramasynyń barlyq oıyndary men Álem chempıonatynyń ózge de komandalary arasyndaǵy kezdesýlerdi tikeleı efırde kórsetedi. Onlaın translıatsııany qazsporttv.kz resmı saıty men «Qazaqstan.tv» mobıldi qosymshasynan kórý múmkindigi bar.
