Qazaqstandyqtar fınteh-startaptarǵa arnalǵan jahandyq ınnovatsııalyq konkýrsqa qatysa alady
Onyń barysynda startaptar tólemder men kommertsııa salasyndaǵy bolashaqtyń mindetterin sheshýge arnalǵan ózderiniń ozyq ónimderin usyna alady. Ótinimderdi qabyldaý 14 mamyrǵa deıin jalǵasady, dep habarlaıdy QazAqparat.
Ortalyq jáne Shyǵys Eýropa, Taıaý Shyǵys jáne Afrıka (CEMEA) óńirindegi irikteý fınaly 27 shilde kúni tikeleı efırde TechCrunch saıtynda – tehnologııalyq sala men startaptardyń ekojúıesine mamandanatyn jetekshi onlaın-basylymda kórsetiletin bolady. Konkýrstyń óńirlik kezeńinde jeńiske jetken startap 19 qyrkúıek kúni San-Frantsısko qalasynda (AQSh) TechCrunch Disrupt konferentsııasynda ótkiziletin jahandyq fınalǵa qatysady.
Bıylǵy jyly konkýrsta CEMEA óńirinde alǵash ret qaýipsizdik jáne táýekelderdi basqarý salasyndaǵy marapat – Fintechs Innovating in Risk Excellence, nemese FIIRE syılyǵy tabystalatyn bolady. Emirates NBD áriptestigimen birlese otyryp, Visa arnaıy nomınatsııa aıasynda alaıaqtyqqa qarsy is-qımyl, kıberqaýipsizdik jáne nesıelik táýekelderdi basqarý sııaqty salalarda jahandyq fınteh-oıynshylardy izdestiredi. Visa jáne Emirates NBD ókilderiniń birlesken baǵalaýynan keıin jeńimpaz joba 25 000 AQSh dollary kóleminde júldege ıe bolyp, óńirdiń jetekshi banki – Emirates NBD bankimen jumys isteýge múmkindik alady.
Aıta keterligi, 2015 jyly VEI baıqaýy iske qosylǵan kúnnen bastap 100-den asa eldiń kompanııalary 16 mıllıard AQSh dollarynan astam kólemde qarjylandyrý alǵan, sondaı-aq búkil álemnen 12 000-daı startaptardy qamtıtyn komıýnıtı quryldy. Byltyrǵy jyly bes óńirden 4 000-nan asa startaptar qatysqan baıqaý barysynda 530 000-nan astam AQSh dollary kóleminde júlde qory bólingen bolatyn.
