Qazaqstandyqtar etti kóbirek tutyna bastady
ASTANA. QazAqparat - Qazaqstanda et jáne et ónimderin tutyný kólemi 2018 jyldyń alǵashqy toqsanynda jan basyna shaqqanda ortasha 19,5 kılogramdy qurady, dep habarlaıdy QazAqparat finprom-ǵa silteme jasap.
Bul kórsetkish aldyńǵy toqsanmen salystyrǵanda 0,8% artyq, al jyldyq ósim 6,7% bolyp otyr.
Qalalarda et jáne et ónimderin tutynýdyń jan basyna shaqqandaǵy kórsetkishi 19,9 kılogramdy, al aýyldyq jerlerde 18,8 kılogramdy quraǵan.
Eń kóp suranysqa ıe et túri - sıyr eti. Ony bir toqsanda árbir adam ortasha 6,4 kg tutynǵan. Keıingi oryndarda jylqy eti (1,5 kg) men qoı eti (1,2 kg) tur.
Qalalyq jerlerde tutyný kórsetkishi jaǵynan sıyr eti basymdyqqa ıe. Onyń jan basyna shaqqandaǵy ortasha tutyný kórsetkishi - 6,5 kg. Keıingi oryndarda jylqy eti - 1,5 kg jáne taýyq eti - 1,3 kg.
Aýyldyq jerlerde sıyr etiniń jan basyna shaqqandaǵy tutyný kórsetkishi 6,4 kg. Aýyl adamy, budan tys, bir toqsanda ortasha 2 kg qoı eti men 1,6 jylqy etin tutynady.
Eń qymbat jylqy eti baǵasynyń sharyqtaý shegi 2018 jyldyń shildesinde baıqalyp, onyń 1 kılogramy ortasha 1666 teńge boldy.
Odan keıingi oryndarda sıyr eti - 1500,7 tg jáne qoı eti - 1429,9 tg tur.
Degenmen jyldyq baǵanyń eń joǵary ósý qarqyny shoshqa etinde baıqaldy. Onyń 1 kg etiniń baǵasy bir jylda 8%-ǵa qymbattap, 1287,8 teńgeden bir-aq shyqqan. Keıingi oryndarda 7,9% qymbattaǵan sıyr eti men 7,8% kórsetkishimen jylqy eti tur.
