Qazaqstandyqtar endi úı satyp alý nemese jaldaý kezinde aýdandaǵy qylmys deńgeıin bile alady

ASTANA. QazAqparat – Elimizde krımınogendik jaǵdaı, ýákiletti organdardyń kásipkerlerge qatysty júrgizgen tekserýleri jáne jol-kólik oqıǵalary týraly málimetter qamtylǵan geografııalyq karta ázirlendi. Endi qazaqstandyqtar úı satyp alý nemese jaldaý kezinde aýdandaǵy qylmys deńgeıin bile alady, dep habarlaıdy QazAqparat tilshisi.

Kartany QR Bas prokýratýrasynyń Quqyqtyq statıstıka jáne arnaıy esepke alý komıteti ázirlegen. «Qylmystyq quqyq buzýshylyq kartasynda» zańǵa qaıshy árekettiń qaı bap boıynsha, qashan jáne qandaı jaǵdaıda jasalǵanyn bilýge bolady. Qazirdiń ózinde bul elektrondyq karta elimizdiń iri qalalarynan bastap, shaǵyn eldi mekenderine deıin engizildi.

«Polıtsııa qyzmetkerleri sotqa deıingi tergep-tekserýdiń biryńǵaı tizilimi aqparattyq júıesine quqyq buzýshylyq jasalǵan jer týraly qajetti málimetterdi toltyrǵannan keıin ol avtomatty túrde kartada kórsetiledi. Júıe onlaın rejımde jumys isteıdi. Qylmystar boıynsha derekter avtomatty túrde jańartylyp otyrady», - dedi Quqyqtyq statıstıka jáne arnaıy esepke alý komıtetiniń Aqparattyq-taldaý jumysy, tsıfrlandyrý jáne aqparattyq resýrstardy qorǵaý basqarmasynyń basshysy Dıdar Bultanov.

Sondaı-aq, kartada ýchaskelik polıtsııa pýnktteri kórsetilgen. Sol sııaqty kámeletke tolmaǵandarǵa qatysty jynystyq sıpattaǵy qylmys jasaǵan adamdardyń, jol-kólik apattarynyń jáne kásipkerlerge júrgizilgen tekseristerdiń nátıjeleri kartada kórsetiledi. Qurastyrýshylar bul ónimdi jetildire túsýdi josparlap otyr.