Qazaqstandyqtar endi retsept boıynsha dárilerdi QR kod arqyly alady

ASTANA. QazAqparat – Endi qazaqstandyqtar dáriger jazyp bergen retsept qaǵazyn tasyp júrmeıdi. Atalǵan qyzmet QR kod arqyly qoljetimdi. Tolyǵyraq Densaýlyq saqtaý vıtse-mınıstri Beıbit Esenbaev aıtyp berdi, dep habarlaıdy QazAqparat tilshisi.

«Biz Tsıfrlyq damý jáne aeroǵarysh ónerkásibi mınıstrligimen birlesip taǵy bir jańashyldyq engizdik. Búginde egov Mobile mobıldik qosymshasy arqyly ambýlatorııalyq dárilermen qamtamasyz etý aıasynda «áleýmettik ámııan» jobasy iske qosyldy. Aıtalyq, dáriger patsıentke retsept jazyp berdi, ony qaǵaz túrinde dárihanaǵa alyp barady. Endigi ýaqytta retsept QR kod arqyly usynylady», – dedi Beıbit Esenbaev ortalyq kommýnıkatsııalar qyzmeti alańynda ótken baspasóz máslıhatynda.

Mınıstr orynbasarynyń málimdeýinshe, farmatsevt aqparatty qolmen engizip otyrmaıdy, QR kodty skanerlep, qajetti dárini usynady.

«Atalǵan qyzmet ázirge pılot joba retinde Astana qalasynyń emhanalarynda iske qosyldy. Osyǵan baılanysty azamattardy osy servısti paıdalanýǵa shaqyramyz. 2023 jylǵy 26 sáýirdegi jaǵdaı boıynsha 1005 patsıent QR kodty qoldaný arqyly dári alǵan. Bul qyzmetti jyl sońyna deıin basqa da óńirlerde iske qosý josparlanyp otyr», - deıdi ol.

Buǵan deıin qazaqstandyqtardyń medıtsınalyq analızderdiń nátıjesine onlaın qol jetkize alatyny týraly habarlaǵan edik.