Qazaqstandyqtar emine qarjy jınaǵan 4 jasar sábı kóz jumdy
ASTANA. QazAqparat - Júregine operatsııa jasalýy tıis 4 jastaǵy shymkenttik Vıola Balan qaıtys boldy. Qazaqstandyqtar emine qarjy jınaǵan 4 jastaǵy qyzdyń júreginde aqaýy bolǵan, dep habarlaıdy QazAqparat.
«Qurmetti bizdiń jaqyndarymyz, osydan eki saǵat buryn bizdiń Vıolamyz qaıtys boldy. Bul bizdiń barlyǵymyz úshin orny tolmas ókinish. Bir kezderi Vıolanyń ári qaraı ómir súrýge degen úmitin oıatyp, onyń anasymen bir jyl boıy birge bolýyna úles qosqan azamattardyń barlyǵyna rahmet!»,-dep jazdy qyzdyń týǵan-týystary Instagram paraqshasyna.
Aıta keteıik, Vıola júregine kúrdeli ári qymbat operatsııa jasaýdy qajet etetin edi. Operatsııaǵa 150 myń eýro qajet bolatyn. Sábıdiń operatsııasyna qarjyny qazaqstandyqtar men ózge de shet memleketterdiń azamattary jınady. Densaýlyq saqtaý jáne áleýmettik damý mınıstrligi Vıola Balandy Berlındegi nemis júrek ortalyǵyna jiberý máselesin sheshti.
2016 jyldyń qarashasynda Vıolaǵa Berlınde operatsııa jasady. Osydan bir aı buryn qyzdyń densaýlyǵy qaıta nasharlaı bastady. Ol Astanadaǵy klınıkalardyń birinde jansaqtaý bóliminde jatty. Vıolaǵa ekinshi ret operatsııa jasalýy kerek edi. Ókinishe oraı perishte sábı ol kúnge jete almady.
