Qazaqstandyqtar elorda kúnimen quttyqtaýda
ASTANA. QazAqparat - Búgin shyǵys pen batystyń aıshyqtaryn qatar boıyna sińirip, úılesimdi ushtastyrǵan, Eýrazııa kindigindegi eń belsendi ortalyqqa, álemdik deńgeıdegi sheshimder qabyldanatyn ortalyqqa aınalǵan Astana óziniń 18-shi týǵan kúnin toılaýda.
Aıta keterligi, bul jolǵy elorda kúni elimizdiń Táýelsizdiginiń 25 jyldyq mereıtoıymen tuspa-tus kelip otyr.
Osy rette «QazAqparat» tilshileri qala turǵyndary men elorda turǵyndarynyń merekege oraı pikirlerin bilgen bolatyn.
«Meniń Astanaǵa kelmegenime 14 jyl bolypty. Osy ýaqyt aralyǵynda Qazaqstan elordasy adam tanymastaı ózgergen. Sulý qala salyp, ony abattandyra túsipti. Bul bizdiń Prezıdentimizdiń basty eńbegi. Men úshin búgingi kúni gúldengen, ósip-órkendegen Astanany kórý zor baqyt. Bul barsha qazaqstandyqtardyń maqtanyshy», - deıdi elorda qonaǵy Anna Kolechnıkova.
«Astana búginde álemge keńinen tanymal Qazaqstannyń zamanaýı brendi. Bizdiń sportshylarymyz ben otandastarymyzdyń jetistikteri búkil álemdegi elorda ımıdjiniń qalyptasýyna mol úles qosý ústinde. Búgingi tańda bizdiń elordamyzdy álemdegi kópshilik adamnyń biletindigi qýantady», - deıdi óz kezeginde elorda turǵyny E.Qustanov.
Astananyń taǵy bir turǵyny Nurbol Qasenov kópultty respýblıkamyzda turyp jatqan árbir azamat úshin elorda kúni aıryqsha ystyq ekendigin aıtady.
«Óıtkeni, Qazaqstanda beıbitshilik pen kelisim ornaǵan, memleketimizdiń jetistikteri men tabystary da, elimizdiń Táýelsizdiktiń qysqa ǵana merziminde jınaǵan bedeli de ushan-teńiz. Sol sebepti barlyq otandastarymdy elorda kúnimen quttyqtaımyn. Biz Astanamyzdy búkil álemge pash etetin bolamyz», - dedi ol.
Esterińizge sala keteıik, Táýelsizdiktiń alǵashqy jyldarynda Memleket basshysy N. Nazarbaev respýblıka astanasyn Almatydan basqa óńirge, onyń ishinde ortalyqqa kóshirý týraly máseleni kóterdi. Sonyń arqasynda 1994 jylǵy 6 shilde kúni Qazaqstan Respýblıkasy Joǵarǵy Keńesiniń astanany Almatydan Aqmolaǵa aýystyrý týraly sheshim-qaýlysy qabyldandy.
1997 jyly Qazaqstan Prezıdenti N.Nazarbaevtyń elordany Almatydan Aqmolaǵa kóshirý týraly sheshimi shyqty. Soǵan oraı Aqmolaǵa qaraı resmı kóshtiń basy 1997 jyldyń kúzine qaraı bastaldy. Osy jyldyń 20 qazanynda Prezıdent Qazaqstannyń jańa astanasy - Aqmola qalasy bolǵanyn resmı túrde jarııalady. 1997 jylǵy 8 qarashada Qazaqstan Respýblıkasynyń Memlekettik rámizderi men Prezıdent baıraǵy Aqmola qalasyna jetkizildi.
2006 jyly Astana qalasy ákimdiginiń qaýlysyna sáıkes jáne qalalyq máslıhattyń sheshimimen merekege - Astana kúni resmı ataýy berilip, al ony atap ótý alǵashqy resmı sheshim qabyldanǵan kún - 6 shildege bekitildi. Al 2008 jyly «Qazaqstan Respýblıkasynyń merekeler týraly zańyna» engizilgen ózgeristerge sáıkes, 6 shilde - Astana kúni memlekettik merekeler tizimine endi.
