Qazaqstandyqtar elimizdiń 11 úzdik áleýmettik kásipkerin tańdady
ALMATY. QazAqparat - Qazaqstannyń on bir úzdik áleýmettik kásipkeri «Ozgeris Ustasy» júldesimen marapattalyp, 500 000 teńge kóleminde aqshalaı syılyqqa ıe boldy.
Jeńimpazdar «Ozgeris Ustasy» áleýmettik kásipkerligin ilgeriletý men dáripteýge qosqan úlesteri atap ótilgen saltanatty marapattaý rásimine qatysty. Qazaqstan Respýblıkasynyń 30 jyldyq mereıtoıy aıasynda uıymdastyrylǵan rásim, baıqaýdyń ózi sııaqty, onlaın formatta ótti, oǵan kez-kelgen adam qatysa aldy. Bıylǵy jyly konkýrsqa búkil Qazaqstannan barlyǵy 44 ótinim kelip tústi. Birinshi kezeńde saraptaý komıssııasy 25 fınalısti iriktep aldy.
Al jeńimpazdar ashyq qoǵamdyq daýys berý arqyly anyqtaldy.
Áleýmettik kásipkerlik Qazaqstanda salystyrmaly túrde jańa baǵyt, biraq búgingi kúnniń ózinde bizdiń naryqta myqty, ornyqty jobalar paıda bolýda. Buǵan daýys berýge qatysqan árbir qazaqstandyq ózi kóz jetkize aldy.
«Fınalısterdi anyqtaý ońaıǵa tıgen joq, sebebi árbir ótinish berýshi shyn máninde izgi ıgi is jasaýda, bul rette belgili bir ózekti áleýmettik problemany sheshýge úles qosa otyryp, sonymen qatar tabys tabýǵa jáne jańa jumys oryndaryn qurýǵa múmkindik beretin qyzyqty bıznes úlgiler kóp boldy. Jeńimpazdardy tańdaý isin biz qoǵamǵa senip tapsyrdyq. Bul kóptegen adamdarǵa fınalısterdiń erekshe jobalarymen jaqynyraq tanysýǵa múmkindik berdi. Biz júldeni ekinshi ret ótkizip otyrmyz. Bizdiń qatysýshylarymyzdyń kásipqoılyǵy men Qazaqstandaǵy áleýmettik kásipkerlikke qyzyǵýshylyqtyń artyp kele jatqanyn zor qýanyshpen baıqadyq» - dep Impact Hub Alamaty basshysy Indıra Shah óz áserimen bólisti.
Bıyl júlde ekinshi ret beriledi. Uıymdastyrýshylar qatysýshylardyń kásipqoılyǵynyń artqanyn, sondaı-aq Qazaqstandaǵy áleýmettik kásipkerlikke qyzyǵýshylyqtyń artyp kele jatqanyn úlken qýanyshpen atap ótedi.
«Júldeniń maqsaty - Qazaqstandaǵy áleýmettik kásipkerlik ınstıtýtyna nazar aýdarý, osy salanyń kórnekti mamandarynyń eńbegin qoǵamnyń moıyndaýyna yqpal etý. Áleýmettik kásipkerler degenimiz qoǵam úshin mańyzdy máselelerdi sheshetin, sonymen qatar ózara tıimdi bıznes modelin qura alatyn adamdar. Áleýmettik problemalarǵa uqypty, qurmetpen qaraıtyn adamdar men olardyń kreatıvti sheshimderin kórsetkimiz keledi. El óziniń qaharmandaryn bilýi kerek, múmkin olardyń isteri ózgelerge úlgi bolar», -dedi marapattaý rásiminde ImpactHubAlamaty baǵdarlamalyq menedjeri Farıda Navrýzbekova.
Bıylǵy jyly «úzdiktiń úzdigi» bolyp kelesi uıymdar atandy:
Ekologııa salasyndaǵy áleýmettik kásipkerliktiń úzdik úlgisi bolyp «nól qaldyq» kontseptsııaly HelloEco Ekodúkeni, «Greenup kz» Qoǵamdyq qory;
Mádenıet jáne óner salasyndaǵy áleýmettik kásipkerliktiń úzdik úlgisi bolyp ULY DALA kompanııasy men «Transforma» mádenı keńistigi atandy;
Osal toptarǵa qoldaý kórsetý salasyndaǵy áleýmettik kásipkerliktiń úzdik úlgisi bolyp «Lých Sveta» aýtızm jáne basqa da damý erekshelikteri bar balalarǵa kómek berý qory» Qoǵamdyq qory, Rozalııa ı Emır jekemenshik qory aýtızm jáne sóıleý korrektsııasy Korrektsııalyq Ortalyq, Gúlmıra Ýálıhan Quraq dástúrli qolóner Stýdııasy, «Doshkolnaıa organızatsııa Strana chýdes» JShS, «Rýdnenskoe gorodskoe dobrovolnoe obşestvo ınvalıdov» Qoǵamdyq birlestigi atandy;
Aýmaqtardy damytý salasyndaǵy áleýmettik kásipkerliktiń úzdik úlgisi bolyp «Qareket Jaqsylyq jasa» Qoǵamdyq qory atandy;
Áleýmettik kásipkerler arasynda COVID-19 pandemııasynyń syn-qaterlerin sheshýge arnalǵan ınnovatsııanyń eń jaqsy úlgisi bolyp «Іskerlikke demeý» Qoǵamdyq qory atandy.
«OzgerisUstasy» júldesi 2019 jyly qurylyp, Qazaqstan Respýblıkasynyń Aqparat jáne qoǵamdyq damý mınıstrligi men «Shevron» korporatsııasynyń seriktestiginde ótkizildi.
«Bizdiń kompanııa júldeni uıymdastyrýǵa qýana qatysty, óıtkeni áleýmettik belsendi azamattyq qoǵam óńirde qolaıly bıznes ortany qurýǵa kómektesedi. Biz Qazaqstannyń áleýmettik kásipkerlerin qýana qoldaımyz jáne olardyń kásiporyndarynyń tabysty damýynan úmittenemiz», - dedi Júldeni uıymdastyrýshylardyń biri, Qazaqstanda «Shevron» korporatsııasynyń áleýmettik ınvestıtsııalar boıynsha sýpervaızeri Leıla Aıtmýhanova.
«Biz bes jyldaı áleýmettik kásipkerlikti damytýmen aınalysyp kele jatyrmyz jáne COVID-19 pandemııasy kezinde qoǵam men bıznestiń oǵan qalaı shydap, keıde shyn máninde ınnovatsııalyq amaldardyń qoldanylǵanyn óz kózimizben kórdik. Bul búkil bıznes úshin, áleýmettik kásipkerler úshin de qıyn kezeń. Bireýler beıimdele aldy, bireýler bıznes modelin tipten buryp jańa byǵyttar ashty. Bul bizdi «Áleýmettik kásipkerler arasynda Sovid-19 pandemııasynyń syn - qaterlerin sheshýge baǵyttalǵan ınnovatsııanyń úzdik úlgisi» atty nomınatsııany uıymdastyrýǵa shabyttandyrdy» - dedi Qazaqstandaǵy Eýrazııa Ortalyq Azııa qorynyń baǵdarlamalar dırektory Aıgúl Taǵatova.
«Biz salystyrmaly túrde jas jobamyz. Júlde týraly bizge tanystarymyz aıtyp berdi, árıne, biz ótinim berýge asyqtyq. Óıtkeni, bul adamdarǵa biz nasıhattaıtyn ıdeıanyń mańyzdylyǵy týraly jetkizý múmkindigi. (Jeńimpaz jobanyń qysqasha sıpattamasy). Jeńiske óte qýanyshtymyz jáne barlyq uıymdastyrýshylarǵa alǵysymyzdy bildiremiz», - dep Mádenıet jáne óner salasyndaǵy áleýmettik kásipkerliktiń úzdik úlgisi nomınatsııasynyń jeńimpazy, «Transforma» mádenı keńistiginiń dırektory Anna Sývorova óz oıyn bildirdi.
