Qazaqstandyqtar elektrondyq aqsha júıeleri arqyly 443,5 mlrd teńge aýdarǵan
NUR-SULTAN. QazAqparat - 2019 jyldyń toǵyz aıynda Qazaqstanda 400 mlrd teńgeden astam soma elektrondyq aqsha aýdarý júıeleri arqyly ótti. Bul týraly QR Ulttyq bankinen málim etti, dep habarlaıdy QazAqparat.
2019 jylǵy toǵyz aıda elektrondyq aqsha júıeleriniń emıtentteri 436,4 mlrd teńge somaǵa elektrondyq aqsha shyǵardy, bul ótken jylǵy derekterden 13,5% asady.
«Qazaqstannyń elektrondyq aqsha júıeleri arqyly 443,5 mlrd teńge somaǵa 117 mln tranzaktsııa jasaldy. 2018 jylǵy osyndaı kezeńmen salystyrǵanda júrgizilgen operatsııalar sany 25% artty. Bul kórsetkishterge jeke tulǵalar arasyndaǵy aýdarym operatsııalary jáne zańdy tulǵalar men jeke kásipkerlerdiń paıdasyna taýarlar men qyzmetterge aqy tóleý kiredi», - dep habarlady QR Ulttyq banki Tólem júıeleri departamentiniń dırektory Erlan Ashyqbekov.
Qazaqstan naryǵynda 22 elektrondyq aqsha júıesi jumys isteıdi. Olardyń emıtentteri 10 bank pen «Qazposhta» AQ bolyp tabylady. 2019 jyly 5 jańa elektrondyq aqsha júıesi jumys isteı bastady: «Senim», «AlmaPay», «Onay Pay», «One Click» jáne «QAZEVROMOBAIL».
Qazaqstanda elektrondyq aqsha ınternet-kommertsııaǵa, kommýnaldyq qyzmetterge, uıaly baılanysqa, kredıtter óteýge jáne taǵy basqasyna aqy tóleý úshin paıdalanylady.
