Qazaqstandyqtar elektrondy densaýlyq pasportyna qashan tolyq kóshedi

ASTANA. QazAqparat - Búgingi kúni 10 mln halyqtyń elektrondyq densaýlyq pasporty bar. Bul týraly búgin Úkimettiń selektorlyq rejimdegi otyrysynda Densaýlyq saqtaý  mınıstri Eljan Birtanov aıtty, dep habarlaıdy QazAqparat tilshisi.

"Tsıfrlandyrý aıasynda densaýlyq saqtaý júıesiniń ashyqtyǵyn arttyrý maqsatynda mynadaı sharalar josparlanǵan: biryńǵaı ınteroperabeldilik platformasyn óndiristik paıdalanýǵa berý, barlyq aqparattyq júıelerdiń ıntegratsııasy, 2019 jylǵy 1 qańtardan bastap saladaǵy medıtsınalyq qujattamany qaǵazsyz júrgizý, jergilikti elektrondyq densaýlyq pasporttaryn ulttyq densaýlyq pasporttarymen úılestirý», - dedi ol.

Mınıstrdiń dereginshe, búgingi kúni 10 mln halyqtyń elektrondyq densaýlyq pasporty bar.

«2020 jylǵa qaraı halyqtyń 100 paıyzynda elektrondyq densaýlyq pasporttary bolady. Bul árbir adamnyń qaı mekemege júgingenine qaramastan azamattyń densaýlyǵy týraly obektıvti derekterge tolyq qoljetimdilikti qamtamasyz etýge múmkindik beredi. Medıtsınalyq kómek alýdyń sapasy men yńǵaılylyǵyn jaqsartady»,-  dedi ol.

Eljan Birtanovtyń aıtýynsha, «100 naqty qadam» Ult josparyna sáıkes «Áleýmettik medıtsınalyq saqtandyrý qory» quryldy. Qorda 100,5 mlrd teńge jınaqtaldy.

«2018 jylǵy 1 qańtardan bastap qor Tegin medıtsınalyq kómek qyzmetteriniń biryńǵaı satyp alýshysy bolyp tabylady»,-  dedi mınıstr.