Qazaqstandyqtar elektrondy densaýlyq pasportyna aýysady - T.Dúısenova

ASTANA. QazAqparat - 2020 jylǵa qaraı Qazaqstannyń memlekettik densaýlyq saqtaý júıesi tolyq elektrondy nusqaǵa aýysady. Osylaısha, ár azamattyń elektrondy densaýlyq saqtaý pasporty bolady. Bul týraly búgin áleýmettik qamtamamyz etý salasyndaǵy ozyq tehnologııalar týraly halyqaralyq konferentsııa aıasynda ótken brıfıngte Densaýlyq saqtaý jáne áleýmettik damý mınıstri Tamara Dúısenova málim etti.

"Búginde biz densaýlyq saqtaý salasynyń memlekettik elektrondy júıesin ázirleýge kiristik. Budan ózge, úsh qyzmet túrin, ıaǵnı, dáriger shaqyrtý, dárigerdiń qabyldanýyna jazylý men ambýlatorııalyq qyzmet kórsetetin uıymdarǵa erkin tirkelý qyzmetterin ınternet arqyly usynyp jatyrmyz. Jalpy, densaýlyq saqtaý salasynyń memlekettik elektrondy júıesine tolyǵymen 2020 jylǵa qaraı aýysyp bitemiz", - dedi mınıstr.

Densaýlyq saqtaýdyń elektrondy júıesi aıasynda qazaqstandyqtar elektrondy densaýlyq pasporttaryna ıe bolmaq. Elektrondy pasport týraly aıta kele T.Dúısenova elektrondy densaýlyq pasporty adamnyń densaýlyǵyna qatysty tipti eń bolymsyz aqparattardy bir bazaǵa jınaıtynyn jetkizdi.

"Elektrondy densaýlyq pasporty adamnyń densaýlyǵyna qatysty búkil aqparatty, ıaǵnı, týǵanynan bastap tipti qandaı zattarǵa allergııasy bar ekenine deıin, búkil aqparatty bir bazaǵa jınaıdy", - dep túsindirdi mınıstr.