Qazaqstandyqtar elde júrgizilip jatqan saıasatty qoldaý úshin daýys beretinine senimdimin - N.Nazarbaev
ASTANA. QazAqparat - Qazaqstan Prezıdenti Nursultan Nazarbaev Astana qalasynyń №81 saılaý ýchaskesinde boldy, dep habarlaıdy Aqordanyń baspasóz qyzmetinen.
Nursultan Nazarbaev elordanyń Oqýshylar saraıynda ornalasqan saılaý ýchaskesine kelip, Qazaqstan Respýblıkasy Prezıdentiniń saılaýynda daýys berdi. Memleket basshysy daýys berý quqyǵyna ıe 9,5 mıllıonǵa jýyq qazaqstandyq 9700-den asa saılaý ýchaskesinde saılaýǵa qatysyp jatqanyn atap ótti. - Búgin azamattar konstıtýtsııalyq paryzyn óteý quqyǵyna ıe. Ekinshi jaǵynan, olardyń óz bolashaǵyn tańdaýǵa, bıliktiń qyzmetine baǵa berýge múmkindikteri bar. Qazaqstandyqtar eń aldymen elimizdiń turaqty damýy úshin, halyq turmysynyń jaqsarýy úshin, óziniń jáne balalarynyń bolashaǵy úshin, sondaı-aq meniń basshylyǵymmen elde júrgizilip jatqan saıasatty qoldaý úshin daýys beretinine senimdimin, - dedi Qazaqstan Prezıdenti. Nursultan Nazarbaev saılaýdyń transparenttiligine nazar aýdardy. - Saılaý úderisi men daýys berý barysyn is júzinde 40-qa jýyq el men halyqaralyq uıymdar atynan ókildik etken 850-deı sheteldik baıqaýshylar baqylaýda. 170-ke tarta sheteldik BAQ tirkeldi. Biz búkil álemge zańdylyqtyń saqtalýyn, ashyqtyqty kórsetip otyrmyz. Baıqaýshylar ádil baǵasyn beredi dep sanaımyn jáne saılaýǵa qatysyp, qyzyǵýshylyq tanytqany úshin barshaǵa aldyn ala raqmet aıtqym keledi, - dedi Qazaqstan Prezıdenti. Sonymen qatar Memleket basshysy osy saılaýda qazaqstandyqtar ózine senim bildiretin bolsa, birinshi kezektegi áreketi bes ınstıtýtsıonaldyq reformany júzege asyrý boıynsha komıssııa qurý bolatynyn aıtty. - Bul komıssııa bes kishi toptan turatyn bolady, olar zańnamaǵa ózgeris engizýdi qajet etetin aýqymdy ári kúrdeli jumys kútip turǵandyqtan, dereý iske kirisedi. Jalpy, bul reformalar el damýynyń kezekti kezeńi bolyp sanalady jáne ekonomıkany, saıasatty, qoǵamdy qamtıdy, sondaı-aq transparenttilik pen ashyqtyq úshin qajetti jaǵdaı jasaıdy, - dedi Nursultan Nazarbaev. Qazaqstan Prezıdenti barlyq kandıdattar úshin teń jaǵdaılar jasalǵanyn, sonyń aıasynda olar halyqqa óz baǵdarlamalaryn tanystyra alǵanyn aıtty. - Halyqtyń dástúri men bolmysyn saqtaýǵa, sondaı-aq ekologııalyq máselelerdi sheshýge baılanysty ózge eki kandıdattyń da pikirlerin durys dep esepteımin. Olardyń usynystaryn kún tártibine qosyp, júzege asyrý jolynda birlesip jumys isteýge bolady. Jeke ózim Qazaqstannyń bolashaǵy úshin, atqaryp jatqan jumystarymyzdy jalǵastyryp, nátıjelerin qazirgi jáne kelesi urpaq kórýi úshin daýys berdim, - dedi Memleket basshysy.
