Qazaqstandyqtar Elbasyn saılaýdaǵy aıqyn jeńisimen quttyqtaýda
ANA. 7 sáýir. QazAqparat - Elbasy Nursultan Nazarbaevtyń atyna elimizdiń barlyq aımaqtarynan Qazaqstan Respýblıkasy Prezıdenti bolyp qaıta saılanýyna baılanysty quttyqtaý hattar men jedelhattar aǵylyp kelýde.
Sonymen qatar Qazaqstannyń jazýshylary, ǵalymdary, óner qaıratkerleri, jastar uıymdary, basqa da salalarda qyzmet jasap júrgen qoǵam ókilderi, sondaı-aq Eýropa, Túrkııa, Qytaı jáne Mońǵolııada turatyn qazaq dıasporalarynyń ókilderi prezıdenttik saılaýdyń qorytyndysyna qyzý qoldaý bildirip, málimdemeler jasaýda.
***
Quttyqtaý hattar men izgi lebizderdiń birqatary elimizdegi zııaly qaýym ókilderinen kelip tústi. «Jan tebirenerlik jańa jeńisińizben quttyqtaımyn! El kósegesin kógerter eren eńbegińizge tolaıym tabystar tileımin», - delingen Qazaqstannyń Eńbek Eri, kórnekti qalamger Ábish Kekilbaıulynyń hatynda. Ol Memleket basshysyna júrekjardy lebizin arnap, densaýlyq pen uzaq ǵumyr tileıdi.
Taraz qalasynan joldaǵan jedelhatta Qazaqstannyń halyq jazýshysy Sherhan Murtaza jáne belgili qalamgerler Nesipbek Dáýtaıuly, Arǵynbaı Bekbosyn, Áldıhan Qaldybaev, Elen Álimjan: «Bul saılaý táýelsizdiktiń 20 jylynda aqyl-parasaty pisip-jetilgen, taǵdyrynyń tańdaýyn tanı alǵan, erik-jigeri myqty el-jurttyń kemel kelbetin kórsetti. Nursultan Nazarbaev mereıiniń ústem bolýy - qazaqstandyqtar danalyǵynyń jeńisi! Nursultan Nazarbaev jeńis úshin týǵan bolsa, ol - el-jurttyń kemel kelbetin kórsetti!» degen pikir bildiredi. Jedelhat: «Uqqanǵa bılik - memlekettiń júregi, halyq - sonyń tiregi» dep túıindelgen.
«Qazaqtyń uly perzentin uly jeńisimen quttyqtaımyn! Baqyt qusyń aspanyńda máńgi sharyqtasyn!», dep jazady kórnekti aqyn, Memlekettik syılyqtyń laýreaty Tumanbaı Moldaǵalıev.
Sondaı-aq, jambyldyq aqyn Narsha Qashaǵanuly tilegin: «Kóptiń basyn quraǵan, Táńirden halqyna baq suraǵan, Týralyqtyń týyn bıik ustaǵan, Elińiz Sizge amanat endi, Nuraǵam», degen óleń joldarymen jetkizipti.
«Qazirgideı dúnıeniń astan-kesteńi shyǵyp jatqan alasapyrandy ári jaýapty kezeńinde, zamananyń qıly-qıly tusynda barlyq qazaqstandyqtardyń óz bolashaqtaryn oılap, Sizdi tańdap, el bıliginiń tizginin ózińizge bergendigin halqymyzdyń taǵy bir kemeńgerligi dep esepteımin», dep jazady Aqmola oblystyq «Arqa ajary» gazetiniń bas redaktory, jazýshy, Qazaqstannyń eńbek sińirgen qaıratkeri Jabal Erǵalıev jedelhatynda.
Sonymen qatar, quttyqtaý jedelhattary Qazaqstannyń ár óńirindegi qarapaıym halyq ókilderinen - túrli kásip jáne mamandyq ıelerinen, zeınetkerler men ardagerlerden, ulttyq mádenıet ortalyqtary ókilderinen, aýyl turǵyndarynan, jastar uıymdary men stýdentterden keldi.
Mundaı jedelhattardy Astana qalalyq jedel járdem stansasynyń ujymy atynan bas dáriger Q.Tósekbaev, Myrzashól jurty atynan Ońtústik Qazaqstan oblysy Maqtaaral aýdany Jylysý aýylyndaǵy «Erbosyn» sharýa qojalyǵynyń tóraǵasy Sárýar Tobaǵabylov, Ońtústik Qazaqstan oblysy ózbek etnomádenı ortalyǵy atynan ortalyq tóraǵasy Ikram Hashımjanov joldaǵan.
«...Qazaqstandaǵy búgingi beıbit ómirdi qoı ústine boztorǵaı jumyrtqalaǵan zamanmen salystyrýǵa bolady. Munyń bári Elbasy - Sizdiń kúndiz otyrmaı, túnde uıyqtamaı atqarǵan qyzmetińizdiń aıshyqty aıǵaǵy», dep jazady Aqtóbe oblysy ardagerleri atynan jedelhat joldaǵan bir top ardagerler. Olar «rýhanı azyǵymyz, myzǵymas qazyǵymyz - týǵan Otanymyzdyń abyroıy asqaqtaı bergeı», deı kele, Elbasyǵa myqty densaýlyq, tolaıym tabys tileıdi. Jedelhatqa oblystyq ardagerler keńesiniń tóraǵasy K.Birmanov, Ardaqty ana - B.Otarbaeva, «Munaıshy» qoǵamdyq qorynyń tóraǵasy Á.Ákimov sııaqty bir top soǵys jáne eńbek ardagerleri qol qoıǵan.
Al Jambyl oblysy ardagerler keńesiniń atynan hat joldaǵan ardagerler T.Tórebekov, Á.Sandybaev, T.Jambylov, B.Jańabaev: «Bul jappaı qoldaý Sizdiń táýelsiz Qazaqstandy álemdegi órkenıetti elder qataryna qosyp, qýatty ári dáýletti memleket qurý jolyndaǵy qaıtalanbas tarıhı eńbegińizge berilgen bıik baǵa», dep jazady.
«Bul jeńis - Cizdiń tynymsyz eńbegińizdiń, kóregen saıasatyńyzdyń, úlken parasatyńyzdyń jeńisi. Bul jeńis Qazaqstan halqynyń Sizge degen ystyq yqylasy, sheksiz qurmetiniń kórinisi» dep jazady Baıanaýyl turǵyndarynyń atynan quttyqtap, ıgi tilekterin joldaǵan eńbek jáne soǵys ardagerleri M.Rahmetov, T.Moldabaev, Q.Nazarbaev, ıA.Soldatenko jáne Mýsın. Osylaı jedelhat arqyly quttyqtap, tilektestik bildirgenderdiń ishinde zeınetkerler - Aqmola oblysyna qarasty Sandyqtaý aýdanynyń turǵyny T.Qaımýldın men Ońtústik Qazaqstan oblysy Tólebı aýdanynyń turǵyny T.Káribekov jáne Qyzylorda qalasynyń turǵyny G.Ismaılova da bar.
Memleket basshysyn saılaýdaǵy jeńisimen quttyqtap, aq peıil, shynaıy nıetin bildirip jatqandardyń ishinde jastar da az emes. «Qazaqstan halqy ádil túrde óz tańdaýlaryn jasap, Prezıdentin saılady. Eldiń bolashaǵy úshin bolǵan bul saılaýda halyqtyń ózińizge zor senim, úlken úmit artatynyn taǵy bir márte pash etti», delingen bir top almatylyq jastar joldaǵan hatta.
M.H.Dýlatı atyndaǵy Taraz memlekettik ýnıversıtetiniń jastar komıteti atynan bir top stýdent aq tilekterin arnap, jedelhat joldady. «Biz Sizge tańdaý jasaı otyryp, óz bolashaǵymyzdyń jarqyn bolatynyna senimmen qaraımyz» delingen ýnıversıtettiń jastar komıtetiniń tóraıymy R.Muhtarqulova qol qoıǵan jedelhatta. Ybyraı Altynsarın atyndaǵy Arqalyq memlekettik pedagogıkalyq ınstıtýty ujymy men stýdentteri de Elbasyn quttyqtap, jedelhat joldady. Jedelhat ıeleri Memleket basshysynyń elimizdiń nyǵaıa berýine baǵyttalǵan eńbekterine sáttilik tileıdi.
Sondaı-aq, L.N.Gýmılev atyndaǵy Eýrazııa ulttyq ýnıversıtetinde oqıtyn sheteldik stýdent ıAsyn Qatyran óz hatynda Elbasyǵa alǵys sezimin jetkizedi.
Aqtóbe oblysynyń aýyl turǵyndary atynan kelgen jedelhatta ártúrli aýdannyń ókilderi Elbasyn úlken jeńisimen quttyqtap, Memleket basshysynyń aýylǵa qamqorlyǵy men qoldaýy úshin sheksiz rızashylyqtaryn bildiredi. Oǵan B.Ǵalymov, A.Tóleýov, A.Chemodanov, M.Aqkenjın jáne taǵy da basqa aýyl sharýashylyǵy qyzmetkerleri men kásiporyndar basshylary, sharýa qojalyqtarynyń jetekshileri jáne eńbek ardagerleri qol qoıǵan.
***
Qazaqstannyń ǵylymı qaýymdastyǵynyń prezıdenttik saılaý qorytyndylaryn qoldaǵan málimdemesi
Qazaqstan Respýblıkasy Prezıdentiniń bolyp ótken saılaýy adamdardyń Qazaqstan Respýblıkasynyń Tuńǵysh Prezıdenti N.Á.Nazarbaevtyń tulǵasyna degen qurmeti men seniminiń taǵy bir kezekti aıǵaǵyna aınaldy.
Qazaqstannyń tabystary Memleket basshysynyń esimimen tyǵyz baılanysty. Onyń strategııalyq boljamynyń, syndarly da oılastyrylǵan saıasatynyń arqasynda 20 jyl ishinde kóptegen kórsetkishter boıynsha Ortalyq Azııada kósh bastaǵan jańa, ekonomıkalyq damyǵan memleket quryldy.
Ult Kóshbasshysynyń saıasaty ár kezde de memlekettiń bolashaq órkendeýiniń basty sharty bolyp tabylatyn - ǵylym men tehnologııalardy damytýǵa baǵdarlanǵandyqtan N.Á.Nazarbaevtyń saılanýy ǵalymdardyń shyǵarmashylyq bastamasyna qanat bitiredi.
Prezıdenttiń ǵylymı-tehnıkalyq salany jetildirý týraly ıdeıalary zertteýshilerdiń ınnovatsııalyq shyǵarmashylyǵyn júzege asyrýynyń jáne eldiń ındýstrııalyq damýyndaǵy serpilisti qamtamasyz etýdiń yqpaldy quralyna aınalǵan «Ǵylym týraly» Qazaqstan Respýblıkasynyń jańa zańynda kórinis tapqan.
Qazaqstan ǵalymdary Ult Kóshbasshysynyń basshylyǵymen Qazaqstan ǵylymynyń jańa bıikterge jetip, ǵylymı jetistikterdiń álemdik qazynasynan laıyqty oryn alatynyna senimdi.
Biz, Qazaqstannyń búkil ǵylymı qaýymdastyǵy atynan Nursultan Ábishuly Nazarbaevty saılaýdaǵy senimdi jeńisimen quttyqtaımyz jáne Otanymyzdyń órkendeı berýi úshin bolashaqta da onyń otandyq ǵylymdy damytý jónindegi saıasatyna qoldaý bildiretinimizdi jetkizemiz.
QR Ulttyq ǵylym akademııasynyń akademıkteri:
Murat JURYNOV, Salyq ZIMANOV, Seıit QASQABASOV, Sultan SARTAEV, Merýert ÁBÝSEIІTOVA, Serik QIRABAEV.
***
Elimiz erteńine senim mol
Qazaqstan jazýshylarynyń málimdemesi
Qazaqstandyqtar kezekten tys ótken prezıdenttik saılaýda laıyqty tańdaýyn jasady. Halyq óziniń bolashaq taǵdyryn Nursultan Ábishuly Nazarbaevpen tikeleı baılanystyratynyn taǵy bir dáleldep berdi.
Biz, elimizdiń qalamgerler qaýymy, aqyn-jazýshylar bul mańyzdy saıası dodany muqııat qadaǵalap qana qoıǵanymyz joq, Qazaqstan tarıhyndaǵy Elbasynyń eren tulǵasyn, álem tanyǵan qaıratkerlik bolmysyn jáne bolashaqtaǵy atqaratyn isterin qalyń oqyrmanǵa jetkizýge tyrystyq. Sol arqyly halyqtyń óz qalaýyn durys tańdaýyna múmkindiginshe yqpal etýge kúsh saldyq.
Eldegi árbir saıası-áleýmettik, ekonomıkalyq, mádenı reformalardy jiti baqylap otyratyn ult zııalylary - halyqtyń bul tańdaýyn memleket taǵdyryna jáne el múddesine degen adaldyǵy dep baǵalaıdy. Ultymyzdyń kemel keleshegi jolynda jasalǵan iri saıası qadam retinde uǵynady.
Saılaý zań talaptaryna jáne halyqaralyq erejelerge saı ashyq, jarııa ári ádiletti ótkenin atap ótkimiz keledi.
Qaı qoǵam bolsyn qıyndyqsyz, kedergisiz alǵa basqan emes. Biz de jańa qurylyp jatqan memleket retinde álemdik deńgeıdegi saıası talap-tilekterdiń údesinen birtindep shyǵyp kelemiz.
Osyndaı jaýapty kezeńde Qazaqstandy óziniń tarıhı Otany sanaıtyn ózge etnos ókilderi úlken baýyrmaldyq tanytyp, aýyzbirshilik kórsete bildi. Sóıtip, kúlli qazaqstandyqtardyń bul saıası sheshimi - el ishinde ornyqqan kelisim men tatýlyqtyń nátıjesinde júzege asyp otyr.
Bul - táýelsizdigimizdiń 20 jyldyq tarıhynda eldegi saılaý mádenıetiniń joǵary deńgeıge kóterilgenin aıǵaqtaıdy jáne osy tańdaý jańa dáýirdiń jarqyn betteri bolatyny sózsiz.
Azattyq jolynda san ǵasyrlar attan túspeı, kúrespen ótken uly babalardyń ańsaǵan armanyna halqyn Nursultan Ábishuly Nazarbaev jetkizdi. Qazaq elin álemdegi irgeli memleketterdiń qataryna qosyp, shekaramyzdy shegendep berdi. Búginde respýblıkamyzdyń ózge eldermen terezesi teń órkenıetti memleketke aınalýyn búkil álem Elbasynyń esimimen tikeleı baılanysta qabyldaıdy.
Aldaǵy kezeńde de elimiz Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń kóregen basshylyǵymen kórkeıip, gúldene beretinine senimimiz kámil!
Nurlan ORAZALIN, Sherıazdan ELEÝKENOV, Tumanbaı MOLDAǴALIEV, Qalıhan YSQAQOV, Farıza OŃǴARSYNOVA, Sherhan MURTAZA, Marfýǵa AITHOJINA, Ákim TARAZI, Ahmetjan AShIRI, Valerıı MIHAILOV.
***
Qazaqstandaǵy respýblıkalyq etnomádenı birlestikterdiń prezıdenttik saılaý qorytyndylaryn qoldaǵan málimdemesi
Ústimizdegi jyldyń 3 sáýirindegi kezekten tys prezıdenttik saılaýda Ult Kóshbasshysy, Tuńǵysh Prezıdent jáne Táýelsiz Qazaqstannyń negizin qalaýshy Nursultan Ábishuly Nazarbaev saltanatty jeńiske jetti.
Bul ótken saılaý Prezıdenttiń Qazaqstan halqynyń ál-aýqaty men órkendeýine baǵyttalǵan saıası jáne ekonomıkalyq baǵytyna búkilhalyqtyq qoldaýdy is júzinde jáne salmaqty túrde beınelep berdi.
Eldegi etnomádenı birlestikter saılaý qorytyndylaryna óz qoldaýyn bildirip, Nursultan Ábishulyn Memleket basshysy laýazymyna saılanýymen quttyqtaıdy.
Saılaýdyń nátıjeleri obektıvti jáne zańdy, halyqtyń kópshiliginiń erik-jigerin beıneleıdi jáne qazirgi Prezıdenttiń basshylyǵymen qol jetkizilgen elimizdiń ishki jáne syrtqy saıasatyndaǵy talassyz tabystarmen negizdelgen.
Bizdiń elimizde etnostardyń, mádenıetter men túrli dinı senimdegi adamdardyń beıbit ómir súrýiniń baı tájirıbesi jınaqtalǵan. Osynaý erekshe tájirıbe bizdiń birligimizdiń túp tamyryn aıqyndaıdy. Júrgizilip otyrǵan saıasat Qazaqstanda turatyn barlyq etnostardyń dástúrlerin, mádenıeti men tilderin qaıta jańǵyrtyp, damytý úshin jaǵdaılar týǵyzdy.
Saılaý nátıjeleri Qazaqstan halqynyń birligine, negizinde táýelsizdik, erkindik, turaqtylyq pen toleranttyq jatqan bazalyq qazaqstandyq qundylyqtarǵa degen adaldyǵyn senimdi túrde dáleldeıdi.
Óz jaýapkershiligin, Qazaqstan úshin saılaýdyń mańyzyn sezine otyryp, etno-mádenı birlestikter ókilderi eldiń búkil oblys ortalyqtarynda «Biz - Qazaqstan halqy» atty Prezıdentti qoldaýdyń jalpy respýblıkalyq elektoraldyq aktsııasyn ótkizdi.
Nursultan Ábishuly Nazarbaevtyń kandıdatýrasyn qoldaı otyryp, biz halyqtyń basym kópshiliginiń saıası erik-jigerin beıneledik, ózimizdiń ulttyq yntymaǵymyzdy kórsettik, halyq birligin nyǵaıttyq.
Biz óz taǵdyrymyzǵa erkin tańdaý jasadyq.
Biz onyń memlekettiń bolashaq turaqty damýy úshin, eldiń álemdegi básekege qabilettiligin arttyrý úshin, bizdiń halqymyzdyń ál-aýqaty men órkendeýi úshin qajet ekenine barynsha senimdimiz.
***
«Atameken» odaǵy» ulttyq ekonomıkalyq palatasynyń prezıdenttik saılaý qorytyndylaryn qoldaǵan málimdemesi
«Atameken» odaǵy» ulttyq ekonomıkalyq palatasy bolyp ótken prezıdenttik saılaýǵa óziniń qoldaýyn bildiredi.
Memleket basshysynyń maqsatty baǵyttalǵan saıasatynyń arqasynda elde naryqtyq ekonomıka qalyptasty, otandyq bıznesti damytý úshin jaǵdaılar jasalyp, jetildirilýde.
Qazirdiń ózinde Qazaqstan ekonomıkasynyń básekege qabilettiligin arttyrýǵa jaǵdaı jasaǵan Memlekettik údemeli ındýstrııalyq-ınnovatsııalyq damý baǵdarlamasy júzege asyrylýda. Neǵurlym qolaıly bıznes-ahýal kórsetkishi boıynsha biz álemde 59-shy oryn alamyz!
Bizder, bıznes ókilderi, sózsiz, Qazaqstannyń búkil tabystaryn Memleket basshysymen, onyń kemeńger de birizdi saıasatymen baılanystyramyz. Onyń basshylyǵymen qabyldanǵan ekonomıkaǵa ınvestıtsııalar tartý, zańnamalardy jetildirý jónindegi sharalar salamatty bıznes orta qurýǵa, Qazaqstan azamattarynyń materıaldyq ál-aýqatyn arttyrýǵa jaǵdaı jasaıdy.
Biz el Prezıdentin saılaýdaǵy senimdi jeńisimen quttyqtaımyz jáne oǵan ekonomıkalyq ósimdi nyǵaıtýda odan ári tabystar tileımiz.
***
Memleket basshysyn saılaýdaǵy tamasha jeńisimen Qazaqstan halqynyń Assambleıasy da quttyqtady.
«Asa qadirli Nursultan Ábishuly!
Qazaqstan halqy Assambleıasynyń músheleri, etnomádenı birlestikter basshylary Sizdi biraýyzdan jáne ystyq yqylaspen 3 sáýir kúni ótken kezekten tys prezıdent saılaýynda qol jetkizgen aıqyn jeńisińizben quttyqtaıdy.
Sizdiń kandıdatýrańyzdy el azamattarynyń 95,55 paıyzy jaqtap, ǵalymdar men zııaly qaýym ókilderi, etnomádenı jáne dinı birlestikter, saıası partııalar men eńbek ujymdary, úkimettik emes jáne qoǵamdyq uıymdarmen qatar jastar erekshe qoldaý bildirdi.
Daýys berýshilerdiń saılaýǵa qatysýdaǵy belsendiligi - halqymyzdyń ósken el, týǵan jer taǵdyryna jaýapkershilik seziminiń asa joǵary ekendigin kórsetti. Jeńis degen shynaıy shyndyq arqyly maqsatqa jetý. Al bizder el bolashaǵy men Táýelsizdikti nyǵaıtýǵa aýyzbirshiliktiń arqasynda jetken halyqpyz. Bizder úshin Táýelsizdikten asqan murat, birlikten asqan qasıetti uǵym joq.
Biz ótkenin umytpaıtyn elmiz! Biz ata-baba muratyn ulyqtaıtyn elmiz! Biz Sizdiń sarabdal saıasatyńyzdyń arqasynda halyq muratyn jańa beleske shyǵaryp, óz keleshegimizdi ózimiz kemeldendirgen elmiz.
Biz atamekenniń kórkin, ata jurttyń abyroıyn asyrý jolynda kúsh-jigerimizdi aıamaıtyn elmiz!
Biz Sizdiń bastamańyzben, jańa memlekettiń jańa qoǵamyn, Táýelsizdik tarıhyn qalyptastyra otyryp, ózimizdi de jańa ýaqyttyń talabyna saı ózgerte bildik.
Sizge daýys bere otyryp, halqymyz ár aptasy jylǵa tatıtyn jetistikterge qol jetkizdi. Sizdiń salıqaly saıasatyńyzdyń arqasynda babalar armany bolǵan TÁÝELSІZDІK ornady, ekonomıkalyq jáne áleýmettik reformalardyń iske asýyn qamtamasyz etken TURAQTYLYQ pen QOǴAMDYQ KELІSІM elimizdi álem elderine tanytty.
Sizdiń basshylyǵyńyzben, Qazaqstan senimdi jáne nátıjeli tabystarǵa qol jetkizdi. Qadirli Otanymyzdyń IGІLІGІ artyp, ÓSІP-ÓRKENDEÝ jolyna tústi.
Sizdiń jeńisińiz - bul búkil Qazaqstannyń jeńisi, halyq abyroıynyń asqaqtaýy, qymbat Otanymyz úshin Táýelsizdiktiń 20 jyldyǵyna eń qymbat syıy.
Halqymyz týǵan jerge degen ystyq sezimin, azamattyq paryzyn, jalpyulttyq kelisimdi, berekeli qazaq jerindegi beıbitshilik pen tynysh ómir úshin óz tańdaýyn jasady.
Biz birge óz taǵdyrymyzdy ózimiz tańdadyq!
Biz Sizdiń basshylyǵyńyzben - bolashaqtyń irgesin birge qalaımyz!!!», - delingen quttyqtaýda.
***
QR Kásipodaqtary federatsııasy da Prezıdenttik saılaýdyń qorytyndysyna qoldaý bildirdi.
«Qazaqstan Táýelsizdiginiń 20 jyly boıynda Elbasy kásipodaqtar qozǵalysyn únemi qoldap keledi. Olardan eńbek adamynyń erteńgi kúnine degen senimidilikti qamtamasyz ete alatyn qabiletti, aıqyn kúshti kóredi, memleketimizdiń ıgiligi úshin jumys jasaýǵa jaǵdaı jasaıdy», - delingen federatsııa málimdemesinde.
Málimdemede atap kósretilgendeı, el ekonomıkasynyń barlyq salalarynyń jáne áleýmettik salasynyń eńbekshileri óz úmitterin qazaqstandyqtardyń bolashaǵy men ál-aýqatyn jaqsartady degen senimmen tek qana QR Prezıdenti N.Nazarbaevpen tyǵyz baılanystyrdy. Sondaı-aq kásipodaqtar Elbasynyń basshylyǵymen Qazaqstanda qoǵamdyq ómirdi demokratııalandyrý baǵytynyń jalǵasatyndyǵyna, eńbekshilerdiń áleýmetti-ekonomıkalyq máseleleriniń sheshiletindigine jáne saıası júıeniń jańaratyndyǵyna senim bildiredi.
«Qazaqstan Kásipodaqtary federatsııasy Tuńǵysh Prezıdent N.Nazarbaevtyń júrgizetin reformalarynyń aınymas qoldaýshysy jáne odan ári de solaı bolyp qala beredi. Memleket basshysynyń saılaýdaǵy jasampaz jeńisimen quttyqtap, myqty densaýlyq jáne bizdiń Otanymyzdyń ıgiligi úshin atqaratyn qyzmetine tabys tileımiz», - delingen málimdemede.
***
"Biz, Qazaqstan Jastar kongresi, Stýdentter Alıansy, «Jasyl el» respýblıkalyq shtaby, Jumysshy jastar odaǵy men Aýyl jastary Odaǵynyń ókilderi Qazaqstan Respýblıkasy prezıdentiniń kezekten tys saılaýy qorytyndysyna qoldaý bildiretindigimizdi málimdeımiz.
2011 jyldyń 3 sáýiri kúni júz myńdaǵan qazaq jastary Memleket basshysy N.Nazarbaevqa óz daýystaryn berdi", - delingen Qazaqstannyń jastar uıymdarynyń taratqa málimdemesinde.
Málimdeme mátininde aıtylǵandaı, Elbasy, Qazaqstannyń Tuńǵysh Prezıdenti N.Nazarbaevtyń memlekettilikti odan ári nyǵaıtý, qarqyndy áleýmettik-ekonomıkalyq reformalardy ótkizý men Qazaqstannyń álemdik arenadaǵy bedelin kúsheıtý týraly bastamalary el jastarynyń arasynda da qoldaýǵa ıe bolyp keledi.
"Qoǵamda bolyp jatqan úrdisterdiń jaýapkershiligin sezine otyryp, el jastary óz tańdaýyn jasady.Biz turaqty, birligi myqty jáne gúldengen Qazaqstanǵa daýys beremiz! Elbasymen birge, alǵa!", - delingen málimdemede.
***
Sonymen qatar Bas redaktorlar klýby Memleket basshysynyń qoǵamdy qaıta jańǵyrtý men qazaqstandyqtardyń ómirin jaqsartý jónindegi saıasatyna qoldaý bildirdi.
Qazaqstan buqaralyq aqparat quraldarynyń 150 basshysy men bas redaktorlary múshe bolyp tabylatyn «Bas redaktorlar klýby» qoǵamdyq birlestigi Memleket basshysyna qoldaý bildire otyryp, búkil qazaqstandyqtardy ortaq jeńispen quttyqtaıdy.
«Qazaqstan Respýblıkasy Prezıdentiniń kezekten tys saılaýy barynsha ashyq túrde ótti dep esepteımiz. Prezıdenttikke kandıdattardyń barlyǵyna birdeı jaǵdaı men quqyq berilip, barlyǵy buqaralyq aqparat quraldaryna birdeı dárejede qol jetkizdi. Barlyq kandıdattar elimizdiń búkil óńirlerinde saılaýaldy naýqandaryn ótkizýge de birdeı múmkindik aldy. Bul -bizdiń elimiz ashyq qoǵam ekendigin dáleldeıdi», - delingen Bas redaktorlar klýbynyń málimdemesinde.
Málimdemede atap kórsetilgenindeı, álem jurtshylyǵy egemendik jyldaryndaǵy ekonomıkalyq ósý men saıası qaıta jańǵyrý turǵysyndaǵy Qazaqstan jetistikterin moıyndady. Memleketpen birge Qazaqstannyń medıa-naryǵy da damý ústinde. Búgingi tańda respýblıkada jumys isteıtin 2,5 myń buqaralyq aqparat quraldarynyń 80 paıyzdan astamy memlekettik emes bolyp tabylady.
***
Sondaı-aq "KAZENERGY" Assotsıatsııasy músheleri de Memleket basshysyn saılaýdaǵy aıqyn jeńisimen quttyqtady. Quttyqtaý mátininde bylaı delingen:
Asa qurmetti Nursultan Ábishuly!
"KAZENERGY" Assotsıatsııasy músheleriniń Qazaqstan Respýblıkasy Prezıdentin saılaýdaǵy erekshe jeńisińizge oraı shyn júrekti quttyqtaýyn qabyl alyńyz.
Kóptegen qazaqstandyqtar sııaqty bizdiń munaı-gaz jáne energetıka salasy qyzmetkerleri men ınvestorlary qaýymdastyǵy Sizdiń kóp jylǵy kúsh-jigerińiz ben bolashaq josparlaryńyzǵa qyzý qoldaý kórsetetinin rastady.
Sizdiń tereń oılastyrylǵan ıdeıalaryńyz ben kóregen is-qımyldaryńyz iskerlik bastamany damytý, halyqaralyq jáne jeke ınvestıtsııalardy tartý, búkil el men onyń energetıkalyq kesheniniń senimdi alǵa basýy úshin Qazaqstannyń tabıǵı baılyqtaryn qazirgi zamanǵy tehnologııalarmen baılanystyrǵan alyp jobalardyń dúnıege kelýine qolaıly jaǵdaılar jasaýdy qamtamasyz etti.
Táýelsizdik jyldary ishinde tek munaı-gaz salasyna salynǵan qarjynyń ózi Qazaqstandy TMD memleketteri arasynda ınvestıtsııalyq kóshbasshy jasaı otyryp, ondaǵan mıllıard dollardy qurady. Osy ýaqyttar ishinde eldegi munaı men gaz óndirisi 4 ese ósti, Qazaqstannyń halyqaralyq munaı rynogyndaǵy úlesi eki ese artty. Atom ónerkásibi men energetıkanyń ózge de sektorlary yrǵaqty damýda. Bizdiń elimiz jahandyq damý úshin eń basty energııa kózderin jetkizip berýshige aınaldy, jáne bul faktor álemde ádil túrde Sizdiń esimińizben baılanystyrylady.
Sizdiń qazirgi jeńisińiz sol kezeńderde ındýstrııalyq-ınnovatsııalyq damý Qazaqstannyń álemdegi básekege eń qabiletti elderdiń qataryna kirýge jaǵdaı jasaıtyn onjyldyqtyń sımvoldyq bastalýyn, sapaly jańa ahýaldy beıneleıdi.
Halyq Sizdiń Qazaqstandy bıznesi ult aldynda jaýapkershilikte bolatyn, isker, ál-aýqatty jáne bilimdi azamattary bar qýatty joǵary tehnologııalyq derjavaǵa aınaldyrý jónindegi josparyńyzǵa qoldaý kórsetetinin málimdedi. Bizdiń assotsıatsııa, búkil energetıkalyq jáne ınvestıtsııalyq qaýymdastyq Sizdiń saıasatyńyzdan jańǵyrý men damýdyń irgeli múmkindikterin kóredi.
Biz qazaqstandyqtardyń búgingi tańdaýynyń halyqtyń Sizdiń qajyrly eńbegińizge izgi nıetti jaýaby, Sizdiń odan ári alǵa basýǵa shaqyrýyńyzǵa sanaly únqatý ekenine senimdimiz.
Sizdiń jeńisińiz - búkil Qazaqstannyń jeńisi!
Qurmetpen,
"KAZENERGY" Assotsıatsııasynyń prezıdenti
Tımýr QULYBAEV.
***
Qazaqstannyń Azamattyq alıansynyń prezıdenttik saılaý qorytyndylaryn qoldaǵan málimdemesi
Óziniń qataryna eldiń barlyq óńirlerindegi 480-nen astam úkimettik emes uıymdardy biriktiretin Qazaqstannyń Azamattyq alıansy ústimizdegi jyldyń 3 sáýirinde ótken kezekten tys prezıdenttik saılaý qorytyndylaryna óziniń tolyq qoldaýyn bildiredi.
Biz Qazaqstannyń Tuńǵysh Prezıdenti N.Á.Nazarbaevty saılaýdaǵy senimdi jeńisimen quttyqtaımyz ári demokratııalyq jáne órkendegen memleket qurýdaǵy onyń kópqyrly qyzmetine odan ári tabystar tileımiz.
Demokratııalyq qoǵam ornatý Táýelsiz Qazaqstannyń 20 jyldyq damýyndaǵy eń basty zańdy jetistikterdiń biri bolyp tabylady.
Óz qataryna 2 mıllıonnan astam qazaqstandyqtardy biriktirgen úkimettik emes sektordyń damýy oǵan aıqyn aıǵaq.
Saılaý qatań túrde qoldanystaǵy zańnamalarǵa sáıkes ótti. Barlyq kandıdattardyń saıası básekelestigi úshin birdeı jaǵdaılar týǵyzyldy. Elektorattyń joǵary belsendiligi halyqty eldi basqarýǵa is júzinde tartýdyń jáne onyń joǵary saıası mádenıetiniń aıǵaǵy boldy. Saılaý Qazaqstanda demokratııalyq jáne quqyqtyq memleket qurý jolyndaǵy kezekti de mańyzdy qadam boldy.
Qazaqstannyń Azamattyq alıansy óziniń memleketpen odan ári de syndarly qyzmettestikte bolý jónindegi berik nıetin málimdeıdi
***
Jastar uıymdarynyń prezıdenttik saılaý qorytyndylaryn qoldaǵan málimdemesi
Bizder, Jastar kongresiniń, Stýdentter alıansynyń, «Jasyl el» respýblıkalyq shtabynyń, Jumysshy jastar odaǵy men Aýyl jastary odaǵynyń ókilderi ózimizdiń Qazaqstan Respýblıkasynyń kezekten tys prezıdenttik saılaýynyń qorytyndylaryna qoldaý bildiretinimizdi málimdeımiz.
2011 jyldyń 3 sáýirinde júz myńdaǵan jas qazaqstandyqtar qazirgi Memleket basshysy N.Á.Nazarbaevqa óz daýystaryn senimmen berdi.
Ult Kóshbasshysynyń, Qazaqstan Respýblıkasynyń Tuńǵysh Prezıdentiniń memlekettilikti odan ári nyǵaıtý, yrǵaqty áleýmettik-ekonomıkalyq reformalar júrgizý jáne Qazaqstannyń álemdik arenadaǵy bedelin nyǵaıtý jónindegi asqaq josparlary el jastarynyń arasynda is júzinde qoldaý tabýda.
Qoǵamda bolyp jatqan úderisterge degen óz jaýapkershiligin sezine otyryp, el jastary óz tańdaýyn jasady.
Biz turaqty, birtutas jáne órkendegen Qazaqstandy qoldaımyz!
Qazaqstan jastary búkil progresshil jurtshylyqty eldiń 2020 jylǵa deıingi damýynyń Strategııalyq josparynyń basymdyqtaryna qol jetkizý úshin óz kúsh-jigerlerin baǵyttaýǵa shaqyrady.
Bárimiz biriksek kúshpiz, bárimiz birigip Qazaqstanbyz!
Prezıdentpen birge, alǵa!
***
Sonymen qatar «Bolashaq» baǵdarlamasy boıynsha shet memleketterde bilim alyp jatqan qazaqstandyq jastar Elbasy Nursultan Nazarbaevty 3 sáýir kúni ótken QR Prezıdentiniń kezekten tys saılaýyndaǵy aıqyn jeńisimen quttyqtap, hat joldady. Onda bylaı delingen:
Qurmetti Nursultan Ábishuly!
Saılaýdaǵy tabysty ári jarqyn jeńisińizben Sizdi shyn júrekten quttyqtaýǵa ruqsat etińiz! Ózińiz qurǵan «Bolashaq» baǵdarlamasynyń stıpendıattary men túlekteri, «Halyqaralyq baǵdarlamalar ortalyǵy» AQ ujymy óz Kóshbasshysynyń jeńisin qýanyshpen qabyldap, týǵan jerlerinen júzdegen, myńdaǵan shaqyrym qashyqta bolsa da óz qalaýlaryn jasaǵandyqtaryn maqtan tutady. Qurama Shtattardan Jańa Zelandııaǵa deıin, Avstralııadan Reseıge deıin shetelde oqıtyn 3000-nan astam bolashaqtyq daýystaryn árdaıym bolashaqta óz Prezıtentterimen bolýǵa berdi.
Sizdiń basqarýyńyzben zamanaýı, qarqyndy, áleýmetti Qazaqstandy birlese qurý múmkindiginiń bolǵanyna qýanyshtymyz. Basshylyq jasaýyńyzben elimiz aıtarlyqtaı qysqa merzimde shıkizattyq kezeńnen ındýstrıaldyq jáne tehnıkalyq kezeńge batyl qadam jasady. Siz bastaǵan reformany jalǵastyryp, Otanymyzdyń jarqyn bolashaǵyn qamtamasyz etý úshin árqashan qolymyzdan kelgendi jasaýǵa aıanbaıtyndyǵymyzdy bildirgimiz keledi.
Sizge ortaq memleketimizdi gúldendirý jolynda tabystar men myqty densaýlyq tileımiz.
Qurmetti Nursultan Ábishuly, biz árqashanda ózińizben birgemiz!
Asa qurmetpen,
«Bolashaq» baǵdarlamasynyń stıpendıattary,
«Bolashaq» baǵdarlamasynyń túlekteri,
«Halyqaralyq baǵdarlamalar ortalyǵy» AQ qyzmetkerleri.
***
Sondaı-aq Memleket basshysyn saılaýdaǵy aıqyn jeńisimen Qazaqstan jastarynyń Kongresi de quttyqtady. Qutyqtaý hattyń mátininde bylaı delingen:
Asa qurmetti Nursultan Ábishuly,
Aıtýly dodadaǵy aıbyndy jeńisińizben quttyqtaýymyzdy barsha qazaq jastarynyń atynan qabyl alyńyz. Biz Sizdiń jeńisińizge birde bir sát kúmán keltirgen emespiz. Jastar qashanda Sizdiń janashyrlyq qasıetińizdi joǵary baǵalap, qurmet kórsetýge daıyn ekendigin jetkizgimiz keledi. Árdaıym halqymyz Sizge kúsh-qýat berip, densaýlyǵyńyz myqty bolyp, áli de bolsa qazaq halqyn bıik belesterge jeteleı berińiz degen tilegimiz bar. Ózińiz bastaǵan sarabdal jol, salıqaly keleshekke Sizben birge kýá bolaıyq, qazaq halqynyń mańdaıynan qýanyshty sátter men baıandy baqyt ketpesin. «Qasym hannyń qasqa joly, Esim hannyń eski joly» degen uǵym bolsa, endigi kezekte «Nursultannyń nurly joly» degen uranmen kósh basyna ilgerleı bereıik. 2001 jyly Ózińizdiń bastamańyzben qazaq jastarynyń basyn biriktiretin uıym retinde qurylǵan «Qazaqstan jastarynyń Kongresi» búginde elimizdiń jastaryn Sizdiń saıasatyńyzdyń qol astyna biriktirý jolynda jumys jasap keledi. Biz árqashan Sizge qoldaý kórsetýge daıynbyz. Biz Sizdiń komandańyzdamyz. Elbasymen tek qana alǵa umtylamyz!", - delingen quttyqtaýda.
Quttyqtaý hatta atap kórsetilgenindeı, sońǵy eki jyl elimiz úshin 10 jylǵa tatıtyn aıtýly oqıǵalarmen tarıh betterine altyn árippen jazyldy. Elimizdiń álemdik arenadaǵy orny men bedeli odan ári nyǵaıa túsip, Elbasynyń basqarýymen kıeli ult, qaharman halyq sheti joq damýdyń dańǵyl jolymen ilgeri qadam basyp barady. Ústimizdegi jyldyń 3 sáýiri búkil halyqtyq merekege aınalyp, taǵy da álem jurtshylyǵynyń nazary Eýrazııa keńistiginiń júreginde ornalasqan qasıetti mekenge aýdy. Bul aıtýly kún qazaq halqynyń birligi bekem, aýyzbirshiligi mol, myzǵymas ult ekenin taǵy bir dáleldep berdi. Bir jeńnen qol, bir jaǵadan bas shyǵaryp, bir aýyzdan qazaq halqyna basshylyq etýge Elbasy ǵana laıyq ekendin aınymaı tanyp, sezine bildi.
"XVI ǵasyrda qazaq halqy Abylaıdy han etip kóterse, HHІ ǵasyrda óz halqyńyz Sizdi Prezıdent etip qaıta saılady. Budan halyqtyń Sizge degen asqan senimdiligin, árdaıym qoldaý kórsetýge daıyn ekendigin kórýge bolady", - delingen quttyqtaýda.
***
«QAZKA» Qazaqstan Kásipkerleri qaýymdastyǵynyń músheleri Nursultan Ábishuly Nazarbaevty Qazaqstan Respýblıkasynyń prezıdenttigine qaıta saılanýymen shyn júrekten quttyqtady.
Osynaý aıqyn jeńis barsha Qazaqstan halqynyń Elbasymyzǵa degen seniminiń joǵary dárejesiniń dáleli. Elimizdiń táýelsizdik kezeńinen bastap Elbasy basshylyǵymen saıası jáne áleýmettik-ekonomıkalyq reformalardy iske asyrýda, álemdik qoǵamdastyqqa ıntegratsııalanýda, kóp ultty halyqtyń beıbitshilik pen meıirimdilikte jańa memleket salýda eleýli tabystarǵa qol jetkizýine tek qazaqstandyqtar ǵana emes, búkil álem kýá, delingen quttyqtaýda.
Qazaqstan Elbasymyzdyń kóshbasshylyǵymen aldyńǵy qatarly demokratııalyq memleketke aınaldy.
Elbasymyzdyń orasan zor saıası tájirıbesi, ómirlik danalyǵy men sarqylmas kúsh-qýaty áli uzaq jyldar boıy Qazaqstan halqynyń múddesine qyzmet etetinine kúmán joq.
**
Eýropa, Túrkııa, Qytaı jáne Mońǵolııada turatyn qazaq dıasporalarynyń birlesken málimdemesi
Qazaqstan prezıdentin saılaý jarysynda Nursultan Nazarbaevtyń aıqyn basymdyqpen jeńiske jetkenine búkil álem kýá boldy. Biz - elden jyraqta turatyn 5 mıllıonǵa jýyq qazaq bul saılaýǵa erekshe ynta-yqylas, aıryqsha qyzyǵýshylyq tanyttyq. Soǵan baılanysty shetelderdegi qazaq mádenı ortalyqtary ártúrli deńgeıde jıyndar ótkizdi. Saılaýǵa qatysýǵa múmkindigimiz bolmasa da, júrekten shyqqan aq tilegimiz, adal nıetimiz Nazarbaev jaǵynda ekendigin sol basqosýlarda ashyq bildirip jattyq. Óıtkeni, Nazarbaev dúnıeniń tórt buryshynda shashyrap júrgen qazaqtardyń basyn tarıhı Otanymyzǵa jınaýǵa bar kúsh-jigerin jumsady. Bul iste tolaıym tabystarǵa qol jetkizdi. Biz Elbasynyń osy qaıratkerligin jaqsy bilemiz, ári qatty baǵalaımyz.
Sondyqtan Nursultan Nazarbaevtyń saılaýdaǵy jeńisin bizdiń bárimiz zor qýanyshpen qarsy aldyq. Bul jeńis - tek Qazaqstan turǵyndary ǵana emes, jer júziniń ár qıyrynda júrgen ıisi qazaq aǵaıyn úshin asa mańyzdy taǵdyrly oqıǵa. Elbasyǵa shyn júrekten quttyqtaý aıtamyz.
A.KESEDJI, professor, Eýropa qazaqtary federatsııasynyń tóraǵasy (Mıýnhen); Sh.NAIMAN, zeınetker, Eýropa qazaqtarynyń ardager aqsaqaly (Mıýnhen); A.ShETIN, zeınetker (Keln); M.ZENGIN, kásipker (Oslo); I.QOSShY, kásipker (Stokgolm); D.QYLYSh, kásipker (Ystambul); S.JANBOLAT, qoǵam qaıratkeri (Úrimshi); R.ASAI, professor (Ýlan-Bator).
***
Reseıdiń Tver oblysyndaǵy Rjev qalasynyń basshysy Aleksandr Şetının Qazaqstan elshisi Zaýytbek Turysbekovtiń atyna hat joldap, barsha qazaqstandyqtardy Nursultan Nazarbaevtyń saılaýdaǵy zor jeńisimen quttyqtady.
«Qazaqstan halqy turaqtylyqty saqtaýdy, qoǵamnyń jańarýyn jáne memlekettiń serpindi damýyn qoldap, óz erkin bildirdi»,- dep jazady ol.
Ótken jyly Qazaqstan Prezıdentiniń tapsyrmasyna sáıkes «Nur Otan» partııasynyń, Aqtóbe oblysy ákimdiginiń qoldap, kómektesýimen Rjev qalasynda qazaqstandyq 100 jáne 101-derbes atqyshtar brıgadalarynyń qaza tapqan jaýyngerlerine arnalyp, eńseli eskertkish turǵyzyldy. Elshilik dıplomattary Reseı Federatsııasy Qorǵanys mınıstrliginiń ortalyq muraǵatynan qazaqstandyq 10 myń jaýyngerdiń aty-jónin taýyp, bul esimder keshenniń granıt qabyrǵasyna oıyp jazylǵan bolatyn.
«Osy memorıaldyq keshen ornatylǵannan beri bizdiń ózara dostyǵymyz burynǵydan da nyǵaıa tústi, - deıdi Rjev qalasynyń basshysy. - Qazir barlyq rjevtikter Qazaqstan Prezıdenti Nursultan Nazarbaevtyń saılaýdaǵy jeńisimen qazaqstandyqtardyń osynaý búkilhalyqtyq qýanyshyna ortaqtastyǵyn bildirýde».
Jaqsylyq jaqsylyqty shaqyrady degen ras eken. Rjev qalalyq dýmasy Qazaqstan elshiliginiń usynysyn qoldap, osy qaladaǵy jalpy bilim beretin №5 orta mektepke qazaqstandyq 100 jáne 101-derbes atqyshtar brıgadalarynyń atyn berdi. Bul bilim uıasy budan bylaı «Tver oblysynyń Rjev qalasyndaǵy 100 jáne 101-derbes atqyshtar brıgadalary jaýyngerleri atyndaǵy jalpy bilim beretin №5 orta mektep» dep atalatyn boldy.
Rjev qalasy basshysynyń pikirinshe, atalǵan sheshim Uly Otan soǵysynda qaza tapqan qaharman jaýyngerler esimin máńgi este qaldyrý jolyndaǵy Qazaqstan men Reseı memleketteri atqaryp kele jatqan birlesken jumysty dástúrge aınaldyryp, eki eldiń arasynda qalyptasqan tarıhı baılanystardy nyǵaıtýǵa, jastardy patrıottyq rýhta tárbıleýge qyzmet etedi.
Elshilik qazir Tver oblysy aýmaǵynda soǵysqan taǵy da 6 qazaqstandyq áskerı quramalardyń jaýyngerleri týraly derekter izdestirý jumysyn jalǵastyrýda. Sondaı-aq elshiliktiń osy óńirde Rjev-Vıazemsk shaıqasynyń murajaıyn qurý týraly bastamasyn «Edınaıa Rossııa» partııasynyń basshylyǵy, Máskeý merııasy, Tver oblysynyń ákimshiligi, Tatarstan jáne ıAkýtııa respýblıkalarynyń basshylyǵy qoldady. Atalǵan joba «Nur Otan» jáne «Edınaıa Rossııa» partııalarynyń qamqorlyǵy aıasynda Máskeý túbindegi shaıqastyń 70 jyldyǵyna oraı júzege asyrylady.
***
Elbasyn saılaýdaǵy tamasha jeńisimen M.Áýezov atyndaǵy Ońtústik Qazaqstan memlekettik ýnıversıtetiniń stýdent jastary quttyqtady. Qyttyqtaý mátininde bylaı delingen:
Asa qadirli Nursultan Ábishuly! Bizder, M.Áýezov atyndaǵy Ońtústik Qazaqstan memlekettik ýnıversıtetiniń stýdent jastary, Sizdi Qazaqstan Respýblıkasynyń kezekten tys ótken prezıdenttik saılaýynda naǵyz kóshbasshy retinde jeńiske jetýińizben shyn júrekten quttyqtaımyz! Saılaýda biraýyzdan ózińizge daýys berdik. Biz Sizdi úlgi tutamyz, Sizge uqsaǵymyz keledi, Sizdi maqtan etemiz. Bizder elimizdiń egemendiginiń nyǵaıa túsýine, ekonomıkasynyń órkendeýine múddelimiz. Bolashaǵymyzdyń jarqyndyǵyna kúmánimiz joq. Óıtkeni, ol Sizdiń jastarǵa jasap otyrǵan qamqorlyǵyńyzdan kórinip tur. Bir ǵana mysal, jastarǵa álemdik úlgidegi "Nazarbaev ýnıversıtetin" ashyp berdińiz. Onda sheteldik bilikti mamandar dáris berýde.
Jastar árqashan Sizben birge. Besaspap maman bolyp, "bolashaqtyń irgesin birge qalaıtynymyzǵa" senimdimiz.
Qurmetti Nursultan Ábishuly! Sizge zor densaýlyq, kúsh-qaırat, muqalmas jiger, elimizdiń damýy úshin tyń ıdeıalaryńyz ben usynystaryńyzdyń, keleli sheshimderińizdiń sarqylmaýyn tileımiz!
M.Áýezov atyndaǵy Ońtústik Qazaqstan memlekettik ýnıversıtetiniń jastary atynan: jastar isi jónindegi komıtet tóraıymy A.Abdrahmanova; stýdenttik kásipodaq uıymynyń tóraǵasy J.Qorǵanbaev; stýdenttik rektor Z.Orynbekov; «Jas Otan» Jastar qanatynyń atqarýshy hatshysy N.Altaev; «Qazaqstan Stýdentteri Alıansy» respýblıkalyq stýdentter qozǵalysynyń múshesi I.Babık; ýnıversıtet «halyqtar stýdenttik assambleıasynyń» belsendi músheleri D.Ovseev, ıA.Pavlovskaıa, E.Lı, A.Shtýnf, «Aqıqat» pikirsaıys klýbynyń tóraǵasy J.Esenalıev, «Aýyl jastary odaǵynyń» tóraǵasy Ǵ.Turǵynbaev.
ESKERTÝ: Materıal Qazaq aqparat agenttigi men «Egemen Qazaqstan» gazetinde jarııalanǵan aqparattardyń negizinde daıyndaldy
