Qazaqstandyqtar Edınbýrg gertsogy bilim qorynyń syıaqysyn ala alady

ASTANA. QazAqparat - Elimizdiń álemdik ekonomıka jáne saıasat ınstıtýty Brıtanııanyń birqatar ınstıtýttarymen kelissóz jasady, dep habarlaıdy QazAqparat tilshisi ınstıtýttyń baspasóz qyzmetine silteme jasap.

Instıtýt basshysy Erjan Saltybaev Londonda aldyńǵy qatarly taldaý ortalyqtarynyń sarapshylarymen birneshe kezdesý ótkizdi. Atap aıtqanda, Brıtanııanyń halyqaralyq qarym-qatynas salasyndaǵy Chatham House uıymy, Birikken Koroldiktiń qorǵanys zertteý ınstıtýty (RUSI - Royal United Services Institute for Defence and Security Studies), Halyqaralyq strategııalyq zertteýler ınstıtýty (The International Institute for Strategic Studies), Wilton Park keńsesine qarasty atqarý agenttigi jáne Edınbýrg gertsogy bilim qorymen kelissóz júrgizildi.

«Qazaqstan Brıtanııa úshin Ortalyq Azııadaǵy eń iri geosaıası áriptes retinde mańyzdy. Eki el basshylarynyń dostyq qarym-qatynasynyń nátıjesinde búginde halyqaralyq saıasattyń túrli aspektilerin taldaý salasyndaǵy ekijaqty áreket keńeıýde», - dedi QR Tuńǵysh Prezıdenti qoryna qarasty Álemdik ekonomıka jáne saıasat ınstıtýtynyń dırektory Erjan Saltybaev.

Kezdesý nátıjesinde ǵylymı-taldaý salasyndaǵy birikken yntymaqtastyq sharalardy uıymdastyrý týraly qujattarǵa qol qoıyldy. Sonymen qatar, qazaqstandyqtar úshin Edınbýrg gertsogy qorynyń bilim syıaqysyna qatysý týraly kelisim sóz boldy.

Aıta ketsek, QR Tuńǵysh Prezıdenti - Elbasy qorynyń Álemdik ekonomıka jáne saıasat ınstıtýty (ÁESI) 2003 jyly qurylǵan. ÁESI qyzmeti álemdik ekonomıka, halyqaralyq qatynastar, geosaıasat, qaýipsizdik jáne QR Tuńǵysh Prezıdentiniń qyzmetin jáne onyń Qazaqstandy táýelsiz memleket retinde qurýdaǵy jáne nyǵaıtýdaǵy jáne jahandyq beıbitshilik dıalogyn ilgeriletýdegi úlesin zertteýge baǵyttalǵan.