Qazaqstandyqtar djıý-djıtsý boıynsha «Monaco Open» týrnırinde eki altyn medalǵa ıe boldy
ASTANA. QazAqparat - Ótken demalys kúnderi Monakoda NAGA nusqasy boıynsha djıý-djıtsýdan «Monaco Open» halyqaralyq týrnıri ótti.
NAGA - North American Grappling Association - grepplıng pen djıý-djıtsý boıynsha álemdegi úlken jarys.
Eresekter arasynda 79,5 kelige deıingi salmaq dárejesinde Qazaqstannyń MMA Federatsııasynyń baıqaýshy keńesiniń tóraǵasy Aıdar Mahmetov altynnan alqa taqty.
Atap ótý kerek, A.Mahmetov 36 jasta, al onyń qarsylastary 24-26 jasta bolǵan, dep habarlady «Astana» Prezıdenttik klýbynyń baspasóz qyzmetinen.
A. Mahmetov úshin bul bıylǵy djıý-djıtsý boıynsha halyqaralyq syndaǵy ekinshi jeńisi. Ol «ATOS» brazılııalyq djıý-djıtsý akademııasynda Qanat Alınniń basshylyǵymen jattyǵady.
Ardagerler arasyndaǵy 97,5 kg deıingi salmaq dárejesinde 36 jastaǵy Maksım Gýrov jeńimpaz atandy. Ol buryn «Astana» komandasynyń kásibı veloshabandozy bolǵan.
