Qazaqstandyqtar Dýbaıdaǵy mektepte el abyroıyn asqaqtatty
ÁBÝ-DABI-DÝBAI. 24 aqpan. QazAqparat - Osy aptada Dýbaı qalasynda brıtandyq GEMS oqytý júıesi boıynsha oqýshylar men ata-analardyń «Halyqaralyq kún» (International Day) sharasy ótkizildi.
Birikken Arab Ámirlikteri - syrttan jumys isteýge keletinder sany óte joǵary, atap aıtqanda el halqynyń 80-85 paıyzyn quraıtyn memleket. Onyń ústine jergilikti halyq «emırattyqtar» ózge ulttarǵa, ózge dindi ustanatyndarǵa shydamdylyǵy jáne toleranttylyǵymen erekshelenedi.
BAÁ-de Parsy shyǵanaǵynyń ózge elderimen qatar Reseı, Ýkraına, Belorýssııa, Qazaqstan, Qyrǵyzstan, Ázerbaıjannan keletinder sany artyp keledi. Qazaqstandyqtar bul elde iri munaıgaz kompanııalarynda, aqparattyq tehnologııa, qonaqúılik ındýstrııa, jáne ınvestıtsııalyq basqarý salalarynda jumys isteıdi. Olardyń balalary kóbinese jergilikti mektepterde amerıkandyq, brıtandyq oqytý júıesi boıynsha bilim alady.
Dýbaı mektepteriniń brıtandyq GEMS kýrsy jyl saıyn mektep oqýshylary men olardyń ata-analary úshin «Halyqaralyq kún» sharasyn ótkizedi. Munda oqýshylar ata-analarynyń kómegimen óz elderiniń tanystyrylymyn ótkize alady. Olar ulttyq erekshelikterinen, salt-dástúrlerinen habardar etetin arnaıy stendiler uıymdastyrady.
Dýbaı mektepteriniń birine shaqyrylǵan QazAqparat tilshisi qazaqstandyqtardyń óz elin joǵary deńgeıde tanystyrǵandyǵynyń kýási boldy. Olardyń stendisinde qazaqtyń kıiz úıi, ásem Astana, respýblıkamyzdyń ásem tabıǵaty, kóshpelilerdiń paıdalanǵan buıymdary qoıyldy. Sheteldikterdi qazaqtyń ulttyq taǵamdary - baýyrsaq pen qymyz erekshe qyzyqtyrdy.
Bir aıta keter jaıt, kelýshiler arasynda kezinde Qazaqstanda turǵan, qazirgi ýaqytta Dýbaıda jumys isteıtin sheteldikter de boldy. Olar qazaqstandyqtardyń qonaqjaılylyǵyn, , kishipeıildiligin yqylaspen eske aldy.
Otanynan alysta júrgen qazaqstandyqtar balalary ulttyq mádenıetti, tildi, salt-dástúrdi umytpaýy tıis dep esepteıdi.
Olar Ábý-Dabıdegi QR Elshiligine osynaý ıgi sharany uıymdastyrýǵa kómekteskendikteri úshin alǵystary bildirdi.
