Qazaqstandyqtar depozıttegi aqshasyn teńgede saqtaǵandy jón kóredi
Bul týraly Ulttyq ekonomıka mınıstrliginiń 2023 jylǵy qańtar-maýsymdaǵy áleýmettik-ekonomıkalyq damýynyń qorytyndysynda aıtylǵan.
Mınıstrliktiń málimetine súıensek, 1 maýsymdaǵy jaǵdaı boıynsha bank sektorynyń ekonomıkaǵa bergen kredıti 25 trln 946,8 mlrd teńge bolǵan.
Onyń ishinde zańdy tulǵalarǵa beriletin kredıtter 10 trln 656,7 mlrd teńge bolsa, jeke tulǵalarǵa beriletin kredıtter 15 trln 290,1 mlrd teńgege jetken.
«Depozıtter 1 maýsymǵa 30 629,2 mlrd teńgeni qurap, 2023 jyldyń basyna qaraǵanda 1% azaıdy. Zańdy tulǵalardyń depozıti – 3,8%, ıaǵnı, 14 trln 711,4 mlrd teńgege deıin tómendese, jeke tulǵalardyń depozıti – 1,7%, ıaǵnı, 15 trln 917,8 mlrd teńgege deıin kóbeıdi. Ulttyq valıýtadaǵy depozıtter úlesi 2022 jylǵy jeltoqsandaǵy 68,4%-ten 2023 jylǵy mamyrda 71,6%-ke deıin ósti», - dep jazylǵan anyqtamada.
Sondaı-aq, aınalystaǵy qolma-qol aqsha kólemi 2023 jyldyń basyna qaraǵanda 0,3% azaıyp, 3 351,4 mlrd teńge bolǵan.
«Aqsha massasy 1,2%, ıaǵnı, 33 trln 890,6 mlrd teńgege deıin tómendedi. 2023 jylǵy maýsymda teńgeniń AQSh dollaryna resmı baǵamy 1 AQSh dollaryna 444,85 – 454,13 teńge aralyǵynda qubylyp, orta eseppen 2023 jylǵy maýsymda 1 AQSh dollaryna 448,5 teńgeni qurady», - dep jazady mınıstrlik sarapshylary.
