Qazaqstandyqtar depozıtte qansha qarjy saqtaýda

NUR-SULTAN. QazAqparat – Bıylǵy qyrkúıek aıynyń sońynda bank júıesindegi depozıtter 21,4 trln teńgeni qurady. Bul týraly Ulttyq bank tóraǵasynyń orynbasary Aqyljan Baımaǵambetov málim etti, dep habarlaıdy QazAqparat tilshisi.

«Bıylǵy qyrkúıektiń sońynda bank júıesindegi depozıtter jyl basynan beri 12,4 paıyzǵa ulǵaıyp, 21,4 trln teńgeni qurady. Teńgemen salymdar 12,6 trln teńgege deıin 16,7 paıyzǵa, valıýtalyq salymdar – 8,7 trln teńgege deıin 6,6 paıyzǵa ósti», - dedi Baımaǵambetov Parlament Senatynyń jalpy otyrysynda.

Onyń aıtýynsha, teńgemen aktıvterdi qorǵaý boıynsha jedel sharalardyń nátıjesinde depozıtterdi dollarlandyrý 2020 jylǵy 9 aıdyń qorytyndysy boıynsha 40,9 paıyzǵa deıin (2020 jylǵy naýryzda 46,7%) tómendedi.

«Uzaq merzimdi kredıtterdiń 12,4 trln teńgege deıin 4,5 paıyzǵa nemese 529,2 mlrd teńgege ósýi nátıjesinde ekonomıkaǵa nesıeler bıylǵy qyrkúıektiń sońynda jyl basynan beri 14,3 trln teńgege deıin 3,5 paıyzǵa (nemese 480,6 mlrd teńgege) ulǵaıdy. Qysqa merzimdi kredıtter 2 trln teńgege deıin 2,4 paıyzǵa nemese 48,6 mlrd teńgege azaıdy», - dedi UB ókili.