Qazaqstandyqtar - Chehııada toǵyzqumalaqtan ótken álem chempıonatynyń jeńimpazdary
ASTANA. 26 shilde. Qazaqparat - Shildeniń 12-si men 20-sy aralyǵynda Chehııanyń Pardýbıtse qalasynda toǵyzqumalaqtan ekinshi álem chempıonaty bolyp ótti.
Týrnır úsh jikteme: blıts (árqaısysyna 7 mınýttan), rapıd (árqaısysyna 25 mınýttan), klassıka (árqaısysyna 90 mınýttan) boıynsha ótkizildi.
Chempıonatqa 10 elden 47 adam qatysty. Olardyń qatarynda Germanııa, AQSh, Reseı, Shveıtsarııa, Túrkııa, Ýkraına, Latvııa, Qyrǵyzstan,Chehııa men Qazaqstan sııaqty elderdiń ókilderi boldy. Bul týraly QR Shtattyq ulttyq komanda jáne sporttyq rezerv dırektsııasynyń baspasóz qyzmeti málimdedi.
Blıtsten erler arasynda 1-shi oryndy - qazaqtandyq Seıitjan Aıdos, 2-shi oryndy - taǵy da otandasymyz Eleýsinov Hákimjan, 3-shi oryndy - Sazaev Quban (Qyrǵyzstan) ıelendi. Áıelder arasynda alǵashqy eki oryndy qazaqstandyqtar - Dalıeva Ásel (1-shi oryn) jáne Áýesbaeva Farıda, 3-shi oryndy - Qudaıbergenova Elmıra (Qyrǵyzstan) aldy.
Rapıd boıynsha úzdik oıyn kórsetken otandastarymyz Aqtaev Serik, Seıitjan Aıdos, Shotaev Maqsat qatarymen birinshi, ekinshi, úshinshi oryndaryn ıelendi. Áıelder arasynda júldeli oryndardy qazaqstandyq Kenına Dıana (1-shi oryn), Áýesbaeva Farıda (2-shi oryn), Maǵaýova Gúljan (3-shi oryn) enshiledi.
Klassıka boıynsha erler arasynda 1-shi oryndy Eleýsinov Hákimjan (Qazaqstan), 2-shi oryndy - Matylov Saılan (Qazaqstan), 3-shi oryndy - Qudaıbergenov Mırlan (Qyrǵyzstan) aldy. Áıelder arasynda 1-shi oryndy Dalıeva Ásel (Qazaqstan), 2-shi oryndy - Kenına Dıana (Qazaqstan) aldy, al 3-shi oryn Sarykeeva Gúljamalǵa (Qyrǵyzstan) buıyrdy.
Aıta keteıik, marapattaý saltanatyna Dúnıejúzilik toǵyzqumalaq federatsııasynyń prezıdenti Álıhan Báımenov qatysty, dep habarlaıdy Eýrazııa birinshi arnasy.
