Qazaqstandyqtar Búkilálemdik jazǵy polonıı oıyndarynan 11 medal ákeldi
ASTANA. QazAqparat - Qazaqstandyq erikti sportshylar óz tarıhynda tuńǵysh ret Polsha memleketiniń Torýn qalasynda ótken XVIII Búkilálemdik polonıı oıyndarynda óner kórsetti, dep habarlaıdy «QazAqparat» HAA tilshisi.
Polonıı oıyndary degenimiz - Polsha Prezıdenti Andjeı Dýdanyń patronattyǵymen kásibı emes sportshylardyń arasynda ótkiziletin saıys. Torýnda básekeniń 25 túri boıynsha 32 memleket qatysty. Oǵan Astana men Almaty qalasynan barǵan 17 adam Qazaqstannyń atynan bar
«Qazaqstan birinshi ret Búkilálemdik polonıı oıyndaryna qatysyp otyr. Mundaı formattaǵy saıys týraly birneshe jyl buryn estigen edik. 2006 jyldyń aqpan aıynda Arlamýva qalasynda ótkizilgen Búkilálemdik qysqy polonıı oıyndaryna komanda ákelgen bolatynbyz. Ol kezde 12 adamnyń ishinen bizdiń eldegiler 9 medal utyp alǵan. Sol kezde jazǵy jarysta da baǵymyzdy synap kórýge bel baılap edik. Kez kelgen adamǵa polonıı oıyndaryna qatysýǵa bolady. Bıyl demeýshi tabylmaǵandyqtan, saıysqa qajetti quraldar men jol aqysyn qatysýshylar óz qaltasynan shyǵardy. Al Polshadaǵy shyǵynnyń bárin uıymdastyrýshy «Vspýlnota Polska» kóterip aldy», - dep habarlady «QazAqparat» HAA tilshisine qazaqstandyq komandanyń kóshbasshysy, Astana qalasynyń «Polska Jedność» uıymynyń jetekshisi Natalıa Kýlakova-Zagorovskaıa.
Básekede eń kóp medal alǵan memleketterdiń úshtigin Chehııa, Lıtva men Belarýs elderi quraǵan. Qazaqstan óz kezeginde 11 medalǵa ıe boldy. Úsh altyn medaldy júzý boıynsha Anatolıı Kýlakov pen Elena Popova, ergometrııadan Marııa Kýlakova ákelse, jalǵyz «kúmisti» velosporttan Andreı Klochko Qazaqstan qorjynyna salǵan.
«Alǵashqy ondyqqa ene almaı qalsaq ta eńsemiz joǵary. 2018 jyl ótetin qysqy polonıı oıyndaryna qatysýdy josparlap otyrmyz. Alǵan áserimiz mol. Oıyndar sóz joq, joǵary dárejede uıymdastyrylǵan. Sporttyń damýyn Polshada óz elimizdegideı talqyǵa salyp, seriktestik ornatýǵa qol jetkizdik», - deıdi N. Kýlakova-Zagorovskaıa.
Aıta keterligi, Búkilálemdik polonıı oıyndary 1934 jyldan beri ár eki jyl saıyn ótkizilip kele jatyr. Oǵan negizinen ár elde ómir súrip jatqan polıaktar qatysady. Sharanyń maqsaty - polshalyq birlestiktiń ıntegratsııasy. 2000 jyldan beri negizgi uıymdastyrýshy - úkimettik emes «Wspólnota Polska» uıymy.
