Qazaqstandyqtar búgin kókpar, qazaq kúresi jáne kókbóri sportynan saıysqa túsedi

IZNIK. QazAqparat - Túrkııanyń Iznık qalasynda ótip jatqan Dúnıejúzilik kóshpendiler oıynynda qazaqstandyq sportshylar búgin, 2 qazanda qazaq kúresi jáne kókpar, kókbóriden saıysqa túsedi, dep habarlaıdy QazAqparat tilshisi.

Qazaq kúresinen el quramasynan erlerden Maqsat Isaǵabylov (80 keliden joǵary), Elaman Qoıshybaev (80 keli), Marat Nyǵmatýllaev (60 keli) bozkilemge shyqsa, áıelderde Raýza Nurmahammetova (55 keli), Zarına Sarıpova Zarına (65 keli), Móldir Azamat (65 keliden joǵary) júldelerdi sarapqa salady.

Kókpardan el quramasy toptyq kezeńde Ózbekstandy 8:1, Mońǵolııany 12:2 esebimen jeńdi.

Osylaısha fınalǵa joldama aldy. Endi fınalda olar Qyrǵyzstan quramasymen bas júldeni sarapqa salady.

Atalǵan qurama sapynda Ulan Baıtóreev, Abylaıhan Nyshanbekov, Qurmanbek Turǵanbek, Yntymaq Álipbaev, Qulajan Toǵaıbaev, Baqytjan Ázimbaı, Dáýlet Aıtan, Arman Jamalbekov, Esjan Qurmanbaı, Islam Rát, Aınabek Berdiqul, Ádilet Mamyt syndy sportshylar el namysyn abyroımen qorǵaýda.

Al kókpardyń qyrǵyzstandyq nusqasy sanalatyn kókbórú sportynan Qazaqstan, Qyrǵyzstan jáne Túrkııa saıysqa tústi.

Nátıjesinde búgin, 2 qazanda fınalda Qazaqstan jáne Qyrǵyzstan quramalary kezdesetin boldy.

Atalǵan sport túrinen el quramasy sapynda Manarbek Dúısenbıev, Abylaı Qarqabat, Ernat Málimbaı, Mádi Seıdillá, Baqytjan Saıdoldanov, Tahır Jumashev, Almat Júnisov, Erǵalym Jaqsylyq, Eldos Asyl, Temirlan Seıitbekov, Qaıyrjan Súleımenov, Ernar Jarylqasyn bar.

Eske salsaq, budan buryn atalǵan dodada Qanat Qasymhan dástúrli sadaq atýdan kúmis aldy.

Kóshpendiler oıyndaryna álemniń 102 elinen 3 myńnan astam sportshy keldi. Qazaqstannyń atynan 50 sportshy kókpar, kókbórú, qazaq kúresi, dástúrli sadaq atý, jamby atýdan synǵa túsýde.